Мәскеу Пхеньяннан тағы қандай зымырандар сатып алуы мүмкін?
Sarbaz.kz жуырда Украинаға қарсы соғыста Ресей Солтүстік Кореяның қару-жарақтарын қолданғаны туралы хабарлаған. Сонымен іргеміздегі ел Ким Чен Ын жетекшілік ететін КХДР-дың қандай техникаларын қолданып жүр?
Ресейдің Украинада нақты қолданған техникаларының бірі – KN-23 зымыраны. KN-23 (Хвасон-11Га) – тактикалық баллистикалық зымыран.
KN-23 алғаш рет 2018 жылы Солтүстік Кореяның әскери шеруі кезінде жұрт назарына ұсылынған және 2019-2020 жылдары аралығында әскери техникалардың қатарына қабылданған. Бұл Солтүстік Кореяның зымыран әлеуетіндегі айтарлықтай алға жылжуын білдіреді. KN-23 Ресейдің «Искандер» техникасына ұқсас. Ресей мен Қытайдың көмегімен жасалған.
Ұшу қашықтығына тоқталар болсақ, Стратегиялық және халықаралық зерттеулер орталығының (CSIS) деректері бойынша KN-23 690 км-ге дейін ұша алады.
KN-23. Фото: missilethreat.csis.org
Reuters басылымы жариялаған ақпаратта, Ақ үй өкілі Джон Кирби Ресей Украинаға қарсы соғыста Солтүстік Кореяның KN-23, KN-24 және KN-25 зымырандарын қолдануы мүмкін екенін айтты. Сонымен бұл зымырандар туралы не белгілі?
KN-24 – АҚШ-тың MGM-140 (ATACMS) тактикалық зымыран жүйесіне ұқсас, Солтүстік Кореяның арсеналындағы тағы бір маңызды баллистикалық қару. Ол – Солтүстік Кореяның қысқа қашықтықтағы баллистикалық зымыраны, алғаш рет 2019 жылдың тамызында сынақтан өткен. Зымыран квази-баллистикалық траектория бойынша ұшады. Ал болжамды ұшу қашықтығы – 410 км.
Қысқа қашықтықтағы баллистикалық зымыран ретінде KN-24 әдеттегі баллистикалық зымырандарға қарағанда жайпақ траекториямен ұшады. Сол себепті Солтүстік Кореяның әскери әлеуетіндегі стратегиялық активке айналды әрі мемлекеттің зымыран технологиясын жетілдіре түсті.
KN-24. Фото: Кореяның орталық ақпарат агенттігі
KN-25 – Солтүстік Кореяның қысқа қашықтықтағы баллистикалық зымыраны. Ұшу қашықтығы – 380 км. Алғаш рет 2019 жылдың 25 тамызында сынақтан өткен. KN-25 дүркіндетіп ату реактивті жүйелерімен жабдықталған.
2019 жылдың 31 қазанында Солтүстік Кореяда жүйені сынау кезінде 370 км ұшып, 90 км биіктікке жеткен. Сол кезде КХДР-дың екі зымыраны қатар ұшып, сынақтан сәтті өткен болатын.
KN-25. Фото: Кореяның орталық ақпарат агенттігі
Айта кетейік, Sarbaz.kz тілшісі БАҚ беттерінде жарияланған ақпаратқа сүйеніп, Ресейдің өзге елдерден қандай қару-жарақ алғанына шолу жасап өтті.
