«Қазіргі уақытта волонтер ретінде Херсонға, Донбассқа барып тұрамын»
Фото Марат Дәрменовтің жеке мұрағатынан
Украинада 21 жылдан бері тұрып жатқан этникалық қазақ, бүгінде қарапайым халықтың ортасында жүрген волонтер Марат Дәрменов соғыстың алғашқы күндеріндегі жағдай туралы айтты, деп хабарлайды Sarbaz.kz тілшісі.
«2022 жылдың 24 ақпанында соғыс басталған сәттен бастап осындамыз. Бәрін өз көзімізбен көріп келеміз. Орыстың әскерлерімен бетпе-бет келмесек те, жарылыстың бәріне куә болып жүрміз. Әсіресе, 2022 жылдың 27-28 ақпан күндері Киевтің айналасын қара түтін басып, қатты өрт болды. Әртүрлі ғимараттар, қоймалар өртенді. Қара түтіннен тіпті күн көрінбей қалды. Түтін аспандағы бұлт сияқты торуылдады. Бүкіл Киев облысының аспанын қара түнек басып кетті», - деді Марат Дәрменов Sarbaz.kz тілшісіне.
Соғыс басталғаннан бері көптеген қазақ азаматтарының елге қайтқанын тілге тиек еткен ол Украинада қалған қазақтардың бәрі аман-есенін жеткізді.
«Мен қазіргі таңда Киевтің іргесіндегі Белогородкада тұрамын. Тас жолымен есептегенде Буча бізге 20 шақырым ғана қашықтықта орналасқан. Жарылыс бізге жақындай бастағанда Бучадағы сияқты қатты жарылыстар болса, ешқайда шыға алмай қалмас үшін елдімекен тұрғындары уақытша жан-жаққа кеттік. Бір айдан аса туыстарымыздың үйінде жүрдік. Бәрі ептеп тынышталған соң үйімізге қайттық. Қазіргі уақытта волонтер болып жүрмін. Херсонға барып тұрамын. Өткенде Донбасс жаққа досымның көлігін апарып тастадым. Сол жақтан баламның көлігін жөндетуге сүйреп алып келдім. Қаншама ауылды жерлер қирап, қалалар қаңырап бос қалған», - деді ол.
Волонтер Марат Дәрменовпен болған сұхбаттың толық нұсқасын осы сілтеме арқылы оқи аласыз.