Пәкістанда партия съезінде болған жарылыстан кем дегенде 40 адам қаза тапты
Мемлекет басшысы Пәкістан Президенті Ариф Алвиге көңіл айту жеделхатын жолдады. Бұл туралы Sarbaz.kz Ақорданың баспасөз қызметіне сілтеме жасап хабарлайды.
Қасым-Жомарт Тоқаев Пәкістан Президенті Ариф Алвиге елдің солтүстік-батысында болған лаңкестік шабуыл салдарынан көптеген азаматтың қаза табуына байланысты көңіл айту жеделхатын жолдады.
Мемлекет басшысы Қазақстан халқының және жеке өз атынан жақындарынан айырылған отбасыларға қайғыра көңіл айтты, сондай-ақ зардап шеккендердің тезірек сауығып кетуіне тілектестік білдірді.
Естеріңізге сала кетейік, Пәкістанда партия съезінде болған жарылыстан кем дегенде 40 адам қаза тапты.
Жарылыс Пәкістанның Хайбер-Пахтунхва провинциясында Ауғанстанмен шекаралас Баджаур ауданындағы «Джамиат Улема-и-Ислам» («Ислам дінбасыларының жиналысы») консервативті-діни партиясының съезінде болды. Конвенция кезінде ғимарат ішінде бомба жарылды. Жараланғандар саны 200-ден асады.
