Адам шығыны мен зардап шеккендер жоқ
24 шілде күні кешке қарай Түркияның Манису, Кахраманмараш провинцияларында және Кемер аймағындағы Анталья провинциясында үш өрт ошағы пайда болды, деп хабарлайды Sarbaz.kz түрік басылымдарына сілтеме жасап.
Естеріңізге сала кетсек, Манису мен Кахраманмараш провинцияларына Антальяға қарағанда шетелдік туристер сирек барады.
Жергілікті БАҚ-тың мәліметінше, 25 шілде күні сағат 10.00-ге дейін Кахраманмараштағы өрт бақылауға алынған. Ал Манисуда және Кемер аймағында тілсіз жаумен күрес жалғасуда.
Кемердегі өрт 24 шілде күні кешкі сағат 21.00 шамасында қаладан 40 км қашықтықта, таулы орманды жерде пайда болған. Жел мен аптап ыстыққа байланысты (түнде Кемерде температура +32,5 градус болған) өрт тез таралған. Алдын ала таулы қалашықтардағы бірқатар үйдің тұрғындары эвакуацияланып, Кемер мемлекеттік госпиталі пациенттерінің (15 адам) кейбірі үйіне қайтарылып, біразы басқа ауруханаларға жеткізілген.
Қазір таулы аумақтағы өртті сөндіруге 200-ге жуық өрт сөндіруші мен муниципалдық қызметтердің қызметкерлері жұмылдырылған. Авиация белсенді қолданылуда (10 ұшақ және 22 тікұшақ).
Анталья провинциясының губернаторы Эрсин Язджидің айтуынша, қазіргі уақытта өрттен бірде-бір үйге, өндірістік немесе тұрғын үйге залал келмеді.
Құзырлы органдардың мәліметінше, шетелдік туристерге қауіп төніп тұрған жоқ. Яғни туристік инфрақұрылым әдеттегідей жұмысын жалғастырып жатыр.
