Бізде баяғыдан үрдіс бар. Күш құрылымдарының баспасөз орталығынан қажетті ақпарат алып, олармен тұрақты түрде шығармашылық байланыс орнатқанды жөн санаймыз.
Қашықтықтан жұмыс істеген алғашқы жылдары маған жүктелгені ҚР ҚК Әскери-теңіз күштері болды. Қолбасшылыққа барып, жауапты адамдармен жүзбе-жүз кездесіп, байланыс орнатуға келіскенімді қайтейін, сол кездегі баспасөз орталығының өкілі осы саладан хабары жоқ па, әлде жүктелген міндеті көп пе, білмедім, ақпарат беруге келгенде ісіне қырын қарады. Оның алдындағы баспасөз қызметіндегі Жәмиладай жұмыла жұмыс істейтін жан болса екен деген ниетте біраз жүрдік. Биыл соған қол жеткізгендейміз.
Күндердің күнінде теңіздегі әскер жайында мағлұмат қажет боп, аталмыш әскери күштердің баспасөз орталығына қоңырау шалдым. Жаңа қызметке келген аға лейтенант ешқандай сөзге келген жоқ. Сұрауымызды қабыл алып, жедел түрде бізді ақпаратқа көміп тастады. Осылайша, ұйымдастырушылығын, қабілет-қарымын бірден байқатты. Жазудан да хабары бар болып шықты. Сөйтсек, бәрі оның мамандығымен, тәжірибесімен ұштасып жатқан дүние екен.
«Мамандығым – қазақ тілі мен әдебиеті пәнінің мұғалімі. Қарулы Күштер қатарында қызметімді бастаған кезеңде құжат айналымын мемлекеттік тілге аудару ісін бірізділікке келтіру және өзге ұлт өкілдеріне қазақ тілін үйрету мақсатында арнайы штаттар ашылды. Сол кезде мен де әскер сапына қосылып, мемлекеттік тілді дамыту ісіне өз үлесімді қостым» дейді сөз басында ол.
Бағаналы сөз етіп отырған кейіпкеріміз, Әскери-теңіз күштері тәрбие және идеологиялық жұмыстар басқармасының аға офицері (баспасөз хатшысы) Меруерт Құрманғажина – Семей облысы, Үржар ауданының тумасы. Өсіп-өнген ортасы, қызметтік жолы осы өңірден бастау алған. «Шығыс» өңірлік қолбасшылығында баспасөз қызметінің сержанты болған ол әскери өмірді көзбен көріп, біраз жайтты көңілге түйеді. Сөйтіп, қызығы да шыжығы мол әскери саладағы замандастарының өміріне көз жүгіртіп, олардың тыныс-тіршілігін, қызметін қаламына арқау етеді.
«Мемлекеттік тілді үйретумен қатар, әскери өмірдің тыныс-тіршілігі жайлы мақалалар жазып, қаламымды ұштай бастадым. Уақыт өте келе ақпараттық жұмысқа деген қызығушылығым артып, баспасөз қызметіне келдім. Фотоаппарат ұстап, әскери өмірдің әсерлі сәттерін кадрға түсіре бастау – менің жаңа қырымды ашқан кезең болды. Осылайша, тіл мен журналистика саласындағы білімімді әскери ортада ұштастырып, өзімді таба білдім» дейді ол.
Міне, содан бері 15 жылға жуық уақыт өтіпті. Бұл аралықта ол Семей гарнизонының ғана емес, Қорғаныс министрлігінің алғашқы баспасөз қзыметінің құрамында жүріп, әскери өмірді республикалық БАҚ-тарда дәріптеді. Тәжірибе жинақтады, біліктілігін танытты, қажырлы,
табанды еңбегін бір кісідей көрсетті. Оның еңбегі елеусіз қалмады. Әскери парадта сап түзеп, естен кетпес сәтті бастан өткерді. Екі жыл қатарынан «Үздік баспасөз қызметінің сержанты» атағын иеленіп, ауыспалы вымпелімен марапатталды. Бұл әскери ақпаратты қоғамға сапалы жеткізу жолындағы адалдығы мен кәсіби шеберлігінің арқасында жетіп отырған игі жетістігі.
«Әскери журналистика – бұл тек жаңалық жеткізу емес, нағыз рух пен ерліктің тарихын жазу. Әскерилердің өмірі – қоғамның қорғаны, елдің тыныштығының кепілі. Сол өмірді шынайы, салмақты әрі рухты түрде халыққа жеткізу – журналистің үлкен жауапкершілігі. Әскери журналистика дәлдік пен адалдықты талап етеді. Әрбір жарияланған материал – сарбаздың еңбегіне берілген баға, ал сол еңбекті лайықты көрсету – әрбір баспасөз қызметі өкілінің кәсіби әрі адамдық парызы», дейді сөз арасында аға лейтенант.
Біз өз міндетін сөзсіз түсінген жанның осы сөзіне қуандық. Алдағы уақытта шығармашылығын қуаттап, бірге жұмыс істеуге пейілміз. Жазарың таусылмасын, өз ісінің шебері, ақпарат майданындағы сенімді жауынгер!
Рима БІЛӘЛҚЫЗЫ
