Шығыс Қазақстан облысы қорғаныс істері жөніндегі департаментінің басшылығы Ұлы Отан соғысының ардагері Александра Тихоновна Саратовцеваны ғасырлық мерейтойымен құттықтап барды.
1925 жылдың 12-ші қазан күні Ресейдің Пенза облысы Иссин ауданындағы Николаевка селосында дүниеге келген Александра Саратовцева 19 жасында соғысқа аттанды. Ол құрылыс взводының құрамында болды. Жарты жыл бойы жауынгерлермен бірге Днепр өзені арқылы өтетін көпірді салуға күш салды. Атыс шебіне жақын қауіп-қатерге қарамастан еңбек етті. Жеңіс күнін Польшаның Новый-Сонч қаласында қарсы алды. Майданнан оралған соң Александра Тихоновна 1953 жылы Ақтөбе қаласына қоныс аударып, еңбек жолын жалғастырды. 2019-шы жылдан бері Өскемен қаласында тұратын қызының қолында.
«Александра Тихоновнаның өмір жолы – ерлік пен еңбексүйгіштіктің, Отанға адал қызмет етудің айқын үлгісі. Бір ғасырлық ғұмыры – соғыстың ауыртпалығы мен жеңістің қуанышын, адам рухының мықтылығын айғақтайтын шежіре», деді Шығыс Қазақстан облысы қорғаныс істері жөніндегі департаменті тәрбие және идеологиялық жұмыстар жөніндегі басқармасының ардагерлермен жұмыс қызметінің бастығы майор Әсет Адамбаев.
Әскерилер ғасыр жасаған ардагерге ерекше құрмет көрсете келе, Қорғаныс министрі авиация генерал-лейтенанты Дәурен Қосановтың құттықтау хатын да табыс етті. Мерейтой иесінің қызы Варвара Николаевнаға да анасына жасап отырған қамқорлығы үшін ризашылықтарын білдірді.
Алуа ИСКАКОВА
