Жас сарбаздар Қазақстанның барлық өңірінен мерзімді қызмет өткеру үшін келіп, жас жауынгер курсынан өтті
Қазақстан Республикасы Ұлттық ұланының 5573 әскери бөлімінің күзгі әскерге шақыру мерзімді қызметінің жас сарбаздары үшін маңызды оқиға болды. Атап айтқанда, елордалық жедел бригада аумағында әскерге шақырылушы жас сарбаздар әскери ант беру рәсімінен өтті. Бұл туралы Sarbaz.kz ҚР Ұлттық ұланының баспасөз қызметіне сілтеме жасап хабарлайды.
Жас сарбаздар Қазақстанның барлық өңірінен мерзімді қызмет өткеру үшін келіп, жас жауынгер курсынан өтті. Бүгін олар Отан қорғаушылармен біртұтас қызметке тұру үшін салтанатты түрде әскери ант қабылдады.
Жыл сайын Ұлттық ұлан қатарына республиканың түкпір-түкпірінен келген жас жігіттер Отанды қорғаудағы өздерінің қасиетті борышын орындау үшін шақырылады. Бұл оларға азаматтарымыздың құқықтары мен бостандықтарын қылмыстық және өзге де құқыққа қарсы қол сұғушылықтардан қорғау бойынша жоғары жауапкершілік жүктейді.
Әскери қалашықтағы карантиндік іс-шараларға байланысты әскери ант беру ата-аналарының қатысуынсыз онлайн-режимде жүргізілді. Сонымен қатар, саптық алаңда Ұлттық ұлан Бас қолбасшысының орынбасары генерал-майор Бауыржан Әбжанов пен Нұра астаналық ауданы әкімінің орынбасары Әлия Әбсеметова жеке құрам алдында сөз сөйледі.
– Бүгін әскери бөлімнің өміріндегі салтанатты оқиға. Әрбір жауынгер үшін әскери ант өмірдің бұзылмайтын Заңы, одан ешқандай шегініс болмайды. Ант қабылдай отырып, әскери қызметші Қазақстан халқына және оның заңды түрде сайланған Президентіне адал болуға, Қазақстан Республикасының Конституциясы мен заңдарын қасиетті сақтауға, өзіне жүктелген міндеттерді сөзсіз орындауға, әскери қызметтің ауыртпалықтарына табандылықпен төзуге міндеттенеді, – деп атап өтті өз сөзінде генерал-майор Бауыржан Әбжанов.
Жас сарбаздардың бірі – қатардағы жауынгер Арслан Тәңіберген Шымкент қаласынан шақырылды. Ол бүгін өз командирлері мен әріптестерінің алдында өнер көрсету құрметіне ие болды.
– Біз өзіміз қабылдаған әскери антқа адал боламыз, әскери қызмет атқаруға лайықты боламыз және елдің қауіпсіздігін қамтамасыз ету үшін бар күшімізді саламыз. Елордада қызмет өткеру құрметіне ие болдық. Біз алдымызға қойылған барлық міндеттерді орындауға және сол арқылы мемлекеттің игілігіне өз үлесімізді қосуға уәде береміз, – деп уәде берді жас сарбаз.
Туыстары мен жақындары үшін әскери ант қабылдау әлеуметтік желілерде онлайн-трансляция режимінде жүргізілді. Тікелей эфир әр взвод үшін бөлек ұйымдастырылды, яғни ешкім назардан тыс қалмады және барлық ата-аналар ұлдарының ант қабылдауын бақылай алды. Әскери рәсімді эфирге шығару аяқталғаннан кейін 5573 әскери бөлімінің командирі полковник Аян Есжанов және оның орынбасарлары тікелей эфирдегі бағыттар бойынша әскерге шақырылушылардың ата-аналарының барлық сұрақтарына жауап берді. Өз кезегінде жас сарбаздардың туыстары мен таныстары өздерінің құттықтаулары мен ізгі тілектерін Instagram-дағы ресми парақшасында жазды.
Естеріңізге сала кетейік, 5573 әскери бөлімінің жеке құрамы елорданың қоғамдық-саяси, спорттық, мәдени іс-шараларына, сондай-ақ Астанада қоғамдық тәртіпті сақтауға белсенді қатысады.
Ант берген сарбаздар жақын арада елорда көшелерінде құқықтық тәртіпті қамтамасыз ету жөніндегі міндеттерді орындауға кіріседі.
