«Жетісу» клубының қақпашысы Глеб Малиновский Ұлттық ұлан сапында Отан алдындағы борышын өтеп жүр
Командир Ұлттық ұлан сапында Отан алдындағы борышын өтеп жүрген танымал футболшы, «Жетісу» клубының қақпашысы Глеб Малиновскийдің жауынгерлік даярлығы жоғары екенін айтты, деп хабарлайды Sarbaz.kz тілшісі «Шығыс» өңірлік қолбасшылығының баспасөз қызметіне сілтеме жасап.
Глеб Малиновский есімі футболсүйер қауымға етене таныс. «Жетісу» клубының қақпашысы ерекше ойын өрнегімен біршама жанкүйердің ыстық ықыласына бөленген. Отан алдындағы борышын өтеуге шақырту алған спортшы клубпен арадағы келісімшартын уақытша тоқтатып, Ұлттық ұлан қатарына қосылды. Жетісу облысы Қарабұлақ ауылының туып-өскен.
Ала доптың аламанына алты жасынан ат ізін салған ұландық алғашында шабуылшы шебінде ойнаған. «Жетісу» футбол клубының жаспөспірімдер тобындағы доп додасының бірінде қақпашы жарақат алып, орынын Глебқа тапсырады. Қақпаға бағытталған толассыз соққыларға тойтарыс берген жас өрен бұдан кейін клубтың негізгі қақпашысына айналады.
«Ойынның елу пайызы қақпашыға байланысты. Сондықтан маған артылған жауапкершілік те жоғары. Бірінші лигада ойын көрсеткен жетісулық клуб 2021 жылы турнир кестесінде бірінші орынға ие болып, премьер лигаға жолдама алды. Мұндай мерейлі күнге жету жолында қосқан титтей де үлесім үшін өзімді бақытты санаймын. Сондай-ақ Ұлттық құраманың жиырма бір жасқа дейінгі ойыншылар арасындағы жиындарға біраз мәрте шақырылдым», - деді қатардағы жауынгер Глеб Малиновский.
Павлодар қаласындағы әскери бөлім жауынгерлік даярлықтан бөлек, спорттық іс-шараларды жиі ұйымдастырады. Бұл, әсіресе, Глеб үшін таптырмас бағалы шақ болып саналады.
«Павлодар гарнизонында ұйымдастырылған футболдан өткен турнирлерде қатардағы жауынгер кәсібилігімен көзге түсті. Сондай-ақ Глебтің жауынгерлік даярлығы да жоғары деңгейде», - деді рота командирі, капитан Нұржігіт Алпысбаев.
Порту клубының ойыншысы Икер Касильясты үлгі тұтатын сарбаз әскер сапында да қажетті жаттығуларын жасап жүр. Ол мерзімді әскери қызметін өткергеннен кейін клубына қайта оралып, теңбіл доптың теңдесіз шеберіне айналуды мақсат тұтады.
