Іс-шара министрліктің қорғаныс саласында өзара іс-қимылды жүзеге асыратын 25 елдің өкілдерінің қатысуымен өтті, деп хабарлайды Sarbaz.kz.
Жиналғандар алдында сөйлеген сөзінде Қорғаныс министрінің орынбасары генерал-лейтенант Сұлтан Қамалетдинов 1990 жылы мемлекеттік егемендік туралы декларация қабылданған Республика күнінің маңызын айрықша атап өтті.
Министрдің орынбасары: «Егеменді мемлекеттіліктің негізгі қағидаттары ретінде біртұтас мемлекет, аумақтың тұтастығы, бөлінбейтіндігі мен қол сұғылмаушылығы, қазақ және өзге де этностардың өзіндік мәдениетін, дәстүрлерін, тілін жаңғырту және дамыту, ұлттық бірегейлікті нығайту белгіленді», – деп тәуелсіз Қазақстанның тұжырымдамалық негіздеріне тоқталып өтті.
Генерал-лейтенант Сұлтан Қамалетдинов мемлекеттің тәуелсіздігі мен аумақтық тұтастығын қамтамасыз етудегі Қарулы күштердің рөліне тоқталды. Ол сондай-ақ қазіргі геосаяси жағдайдың құбылмалылығы халықаралық әскери ынтымақтастықтың қажеттілігін дәлелдейді екенін алға тартты.
Қорғаныс министрлігі көпжақты форматта да, екіжақты қатынастарда да халықаралық әскери ынтымақтастықты дамытуға барынша көңіл бөледі. Халықаралық оқу-жаттығуларды өткізу достық пен ынтымақтастықты нығайтуға ғана емес, елдеріміздің жауынгерлік әлеуетін арттыруға да ықпал етеді, – деді генерал-лейтенант Сұлтан Қамалетдинов.
Сонымен бірге ол әскери-дипломатиялық корпусқа қазақстандық тараптың бастамаларын іс жүзінде жүзеге асыруға белсенді жәрдемдескені үшін ризашылығын білдірді.
Әскери-дипломатиялық корпус атынан әскери атташелердің қазақстандық ассоциациясының дуайені, Үндістанның Қазақстандағы елшілігінің өкілі полковник Дирадж Рамананд сөз сөйледі.
Іс-шара ҚР Қарулы Күштері Ұлттық әскери-патриоттық орталығының шығармашылық ұжымы дайындаған мерекелік концертпен аяқталды.
