Олар 06708 әскери бөлімінің Жауынгерлік Туымен қоштасты
«Астана» өңірлік қолбасшылығы әскерлерінің 06708 әскери бөлімінде мерзімдік қызмет әскери қызметшілерін запасқа шығарып салу рәсімі болып өтті, деп хабарлайды Sarbaz.kz.
Салтанатты іс-шарада Отан алдындағы борышын абыроймен атқарған жеке құрам көп жылдық тарихы бар 06708 әскери бөлімінің Жауынгерлік Туымен қоштасты.
Іс-шара барысында бөлім командирі подполковник Жасұлан Абеков запасқа шығатын әскери қызметшілердің әскери міндетті нағыз ер азамат ретінде адалдық танытқанына өзінің шексіз ризашылығын білдіріп, оларға Мақтау қағазы мен Алғыс хатын салтанатты түрде табыс етті. Құттықтау сөз сөйлегендердің қатарында майор Еркінбек Байбукашев, запасқа шығатын әскери қызметшілер Арман Пішенбаев пен Юрий Ласковец болды.
Приозерск гарнизонындағы Қарулы Күштер ардагерлері ұжымының төрағасы Тілек Кенжебеков пен бөлім командирі подполковник Жасұлан Абеков жолға шыққалы тұрған мерзімдік қызмет әскери қызметшілеріне сәт-сапар ниеттерін білдіріп, олардың алдағы өміріне сәттілік тіледі.
