Қаланың жерасты өткелдерінің бірінде 22 жастағы қыз «қанды» костюмін киіп, семейліктерді бұрыштан қорқытып отырған
Семейде полицейлер жер асты өткелінен елді шошытқан елес қызды қолға түсірді, деп хабарлайды Sarbaz.kz тілшісі Аbai news-ке сілтеме жасап.
Өткен жексенбіде қаланың жерасты өткелдерінің бірінде 22 жастағы қала тұрғыны «қанды» костюмін киіп, семейліктерді бұрыштан қорқытып отырған. Ал осы уақытта серіктесі оның бұл әрекетін, адамдардың реакцияларын – бәрін смартфонға түсірген.
Жастар арасындағы бұл әрекет «пранк» деп аталады. Алайда семейліктердің басым көпшілігі мұндай әзілді дұрыс түсінбей, әлеуметтік желілерде полицейлерге жаппай шағымдана бастаған. Қоғамдық пікірге құлақ түрген полицейлер елес қызды тауып, оның елес тұлғасын анықтады.
«Оған қатысты ҚР ӘҚБтК-нің 434-бабының 1-бөлігі – ұсақ бұзақылық бойынша құқық бұзушылық жасағаны үшін материалдар жиналды. Сот қаулысымен ол кінәлі деп танылып, 69 000 теңге көлемінде айыппұл түрінде әкімшілік жауапкершілікке тартылды», - деп хабарлады облыстық Полиция департаменті.
Айта кетсек, пранкты жастар жергілікті «квест рум» жарнамалық науқаны аясында ұйымдастырған. Елес образындағы қыздың әзілі мен шығармашылығын бағалаған тұрғындар да болған.
