Былтыр сатылған тұрғын үйлердің 34%-ы ипотекамен алынған
2023 жылдың 5 айында Қазақстанда 560 млрд теңгеге жуық ипотекалық несие берілді. Бұл қаражаттың басым бөлігі – 393,3 млрд теңгесі «Отбасы банкінің» (22,6 мың несие) үлесіне тиесілі, деп хабарлайды Sarbaz.kz тілшісі Ranking.kz сайтына сілтеме жасап.
2022 жылдың қорытындысы бойынша ипотекалық несиелердің көлемі 2 триллион теңгеге жуықтаса, оның 1,4 триллионын «Отбасы банкі» (79,9 мың несие) берген.
Бірінші несие бюросының мәліметінше, 2022 жылы ипотекалық сегментте барлығы 159 мың несие берілген. Бұл елдегі жылжымайтын мүлікті сатып алу-сату бойынша 465,8 мың мәміле жасалғанын ескерсек, сатылған барлық тұрғын үйдің 34%-ы ипотекамен алынған.
2023 жылдың мамыр айында ипотекалық несиелердің жалпы портфелі 4,8 трлн теңгеге жетті. Оның 3 трлн теңгеден астамы «Отбасы банкіне» тиесілі.
