Өрт музыка залынан басталғаны белгілі болды
Қарағанды облысының Шахтинск қаласындағы балабақшалардың бірінде өрт шығып, 132 адам эвакуацияланды, деп хабарлайды Sarbaz.kz.
Төтенше жағдай түтіннен басталды. Кейінірек өрт музыка залынан басталғаны белгілі болды. Онда аппаратура, кеңсе жабдықтары мен жиһаз өртенген. Балабақша қызметкерлері бүлдіршіндерді дереу сыртқа шығарған.
Өрт сөндірушілер келгенге дейін ғимараттан 132 адам, оның ішінде 105 бала өз бетінше шыққан. Қаза болғандар мен зардап шеккендер жоқ. Өңірлік ТЖД мәліметіне сүйенсек, өрттің алдын ала себебі – электр жылытқыштың қысқа тұйықталуынан болған.
Ал мекеме директоры Орынбасар Әзімбаева балабақша штаттық режимде жұмыс істейтінін айтты.
«Өрт дабылы қосылды. Біз осындай жағдайлар үшін жасалған алгоритм бойынша әрекет еттік. Ғимараттың электр қуатын өшіріп, балаларды сыртқа шығардық, әрі дереу жедел жәрдем шақырдық. Әрине, басымызға түрлі ойлар келді, біз балалар көміртегі түтінінен тұншығып қалуы мүмкін деп қорықтық. Сондықтан бәрін тез орындадық», - дейді ол.
