19 қыркүйекте Әзербайжанның Таулы Қарабақта терроризмге қарсы операция басталғанын мәлім еткен
Қазақстан бауырлас Әзербайжанның аумақтық тұтастығына толық қолдауын тағы да растайды. Бұл туралы Қазақстан Республикасының Әзербайжан Республикасындағы елшісі Әлім Байел мәлімдеді, деп хабарлайды Sarbaz.kz.
Ол өз сөзінде Қазақстан Әзербайжан тарапының Қарабақтағы армян халқының өкілдерімен кездесу өткізуге бағытталған бастамасын құптайтынын мәлім етті.
«Қазақстан бауырлас Әзербайжанның аумақтық тұтастығына толық қолдауын тағы да растайды. Қалыптасқан жағдай Әзербайжан Республикасының халықаралық деңгейде мойындалған шекаралары шеңберінде бейбіт диалог арқылы жуық арада реттеледі деп үміт білдіреміз. Оңтүстік Кавказда бейбітшілік және өзара тиімді ынтымақтастық атмосферасының орнауы, барлық коммуникациялардың ашылуы өңірдегі барлық елдердің мүддесіне сай келеді деген пікірдеміз», - делінген Қазақстанның Әзербайжандағы Елшісі Әлім Байелдің ресми мәлімдемесінде.
Айта кетейік, 19 қыркүйек күні Әзербайжанның Қорғаныс министрлігі Таулы Қарабақта терроризмге қарсы операция басталғанын мәлім еткен болатын.
