Алғашқы қоңыраудың салтанатты рәсімі мектеп оқушыларын алаңда сапталуымен басталды
1 қыркүйекте Кеңес Одағының Батыры Сабыр Рахымов атындағы Шымкент Республикалық «Жас ұлан» мектебінде «Алғашқы қоңырау» соғылды. Іс-шараға мектептің жеке құрамы, ҚР ҚК ардагерлер қоғамының төрағасы және ауған ардагерлері, сондай-ақ ұландардың ата-аналары қатысты, деп хабарлайды Sarbaz.kz.
Алғашқы қоңыраудың салтанатты рәсімі мектеп оқушыларын алаңда сапталуымен басталды.
Оқушылар мен қонақтарға мектеп бастығы полковник Пернехан Орынбеков құттықтау сөз сөйледі. Жиналғандарға арнаған сөзінде Пернехан Басарбекұлы мектеп тәрбиеленушілері өз білімдерімен және еңбекқорлығымен Отан қорғаушы мамандықтарының беделін арттыруда маңызды рөл атқаратынына сенім білдірді.
«Бүгін бәріміз үшін үлкен мереке. Біз педагогтар мен тәрбиешілерді өз жұмысын ең жоғары деңгейде орындап, мектепте оқитын әрбір тәрбиеленушімізді мақтан тұтқанымызды қалаймыз. Сіздер бір команда болып, өз Отанының нағыз патриоты болатындарыңызға кемел сенеміз. Сіздерге зор денсаулық, жақсы көңіл-күй мен кішкентай болса да жеңіс тілеймін. Баршаңызды мерекемен құттықтаймын!» - деді полковник Пернехан Орынбеков.
Әскери мектептегі білім күні іс-шарасы шақырылған құрметті қонақтардың құттықтау сөздерімен жалғасты. Ата-аналар, мұғалімдер мен ардагерлер ұландарды мерекемен құттықтап, жаңа оқу жылына сәттілік тіледі.
Салтанатты митингіден кейін мектептің көркемөнерпаздар концерті өтті. Қарулы Күштер ардагерлері мен ауған жауынгерлерінің қатысуымен мектеп тәрбиеленушілері үшін «Мектеп – мейірім мекені» тақырыбында бірыңғай сынып сағаты өткізілді. Жиылған жұрт мектептің оқу-материалдық базасымен, сондай-ақ ұландардың өмір сүру жағдайымен танысты.
