Қарағанды қаласындағы республикалық Кеңес Одағының екі мәрте Батыры Талғат Бигелдинов атындағы «Жас ұлан» мектебінде салтанатты түрде соңғы қоңырау соғылды.
Әскери тәртіп пен тәрбиені бойына сіңірген 136 тәрбиеленуші түлектер мектеппен қоштасып, өмірдің жаңа белесіне қадам басты.
Мектептің басшысы, подполковник Жанат Бағжанов түлектерге арнаған жүрекжарды сөзінде:
«Бүгінгі күн – сіздердің есімдеріңіз «Жас ұлан» тарихында алтын әріппен жазылатын сәт. Бұл – тек қоштасу емес, үлкен сенім мен үміттің басы. Алдарыңызда Отанға адал қызмет ететін маңызды жол жатыр. Әрқайсыңызға сәттілік тілеймін!» - деді.
Айта кету керек, ағымдағы жылдың қыркүйегінен бастап «Жас ұлан» әскери мектебі өз қызметін әскери колледж ретінде жалғастырмақ. Бұл – білім беру жүйесіндегі маңызды қадам және болашақ әскери мамандарды дайындаудағы жаңа кезеңнің бастауы болмақ. Өткен жылы оқу ордасы өзінің 40 жылдық мерейтойын атап өткен болатын. Осы уақыт ішінде білім мен тәрбиені қатар берген бұл оқу орны 5 мыңнан астам жас ұланды қанаттандырды.
