Әскери психолог – басқа салалардағы өз әріптестеріне қарағанда ерекше тұлға. Ол – әскери ұжымда әр әскери қызметшінің мінез-құлқысын зерттеушісі, қажет болған жағдайда реттеушісі, жауынгерлік іс-қимыл уақытында алған жан азабының емшісі. Әр әскери психолог алған жоғарғы білімінен бөлек, туа біткен дағды көрегендік қасиет пен адам жан дүниесін тану қабілетіне ие болуы керек. Сол дағдыны дамыту жолында жоғарғы қолбасшылық тарапынан қолдау мен әскери психологтардың күнделікті қызметіне жаңа реңк, леп енгізу мақсатында өзара әрекеттесу жұмыстары ұйымдастырылды.
Қазақстан Республикасы Қарулы Күштері Әуе қорғанысы күштерінің бас қолбасшысы Астана қаласының Астана халықаралық универститеті мен Еуразия ұлттық универститеті ректорларымен өзара әрекеттесу меморандумына қол қойды. Меморандумның талаптарын орындау, әскери психологтар мен студент-психологтардың өзара тәжірибе алмасуы мақсатында жуырда Әуе қорғанысы күштері ТжИЖ бас басқармасының аға офицері (психологы) подполковник Г.Нуракаеваның, Әскери-әуе күштері қолбасшы басқармасы ТжИЖ бөлімінің аға офицері (психологы) майор
М.Тұяқовтың басшылығымен Әскери-әуе күштері қолбасшының басқармасы, 30131, 19132 әскери бөлімдерінің жеке құрамымен ауқымды психологиялық жұмыс іс-шарасы өткізілді. Іс-шарада 15 студент-психологтар әскери қызметшілермен алуан түрлі тренинг, сергіту ойындарын өткізіп, өз кәсіби шеберліктерін көрсетті. Қазіргі таңдағы жаңа әдіс – түйсік тереңінде жатқан мәселелерді қарастыратын, ашып көрсететін метофориялық карталармен де жеке құрамның көңілінен шықты. Қатысқан барша студенттер алғыс хаттармен марапатталды. Бұдан әрі 30131, 19132 әскери бөлімдері
офицер-психологтарының күнделікті қызметінің тыныс-тіршілігімен жұмыс орындарымен танысып, авиациялық техникаларды көрді.
Адам бойындағы мінез-құлықтың айтарлықтай өзгеріске ұшырауы көп жағдайда жеке түрде емес топтық әрекеттерде айқын көрінеді, сондықтан да болып жатқан өзгерістерді уақытында анықтап, өзгерту үшін, жаңа жайлы моральдік-психологиялық климат қалыптастыру үшін жоғарыда аталған тың әдістермен психологиялық жұмыстар өткізіліп тұруы шарт. Бұл әскери психологтар үшін жаңа бағытта жұмыс жүргізуге өз септігін тигізетіні анық, ал өз кезегінде жоғарғы оқу орындарының студенттері өздеріне теңдесіз тәжірибе алады.
Лейтенант Жансәуле Мұсабек,
30131 әскери бөлімі ТжИЖ бөлімінің офицері (психологы)
