Абай гарнизонындағы 44736 әскери бөлімінің жеке құрамы 3-сынып сержанты Болат Зейнелғабиұлы Салимгужиновты құрметті демалысқа шығарып салды.
Болат Салимгужинов Отан алдындағы әскери борышын 1996-1998 жылдар аралығында 82796 әскери бөлімінде калибрі 155 миллиметрлік өздігінен жүретін 2С3М артиллериялық құрылғысы зеңбірегінің аға дәлдеушісі, кейін қару-жарақ командирі лауазымдарында өтеді. Әскери қызметі 2006 жылы 44736 әскери бөлімінен басталды. Аға барлаушы-мерген, топ сержанты, мина жару ісінің нұсқаушысы, маман-барлаушы-мерген, аға маман-аға барлаушы-мерген лауазымдары бойынша міндеттерін абыроймен атқарды. Ол тау, жеңіл сүңгу дайындығынан, десанттық-шабуылдау әскерлерінде сан мәрте даярлықтардан өтті. Халықаралық «Алтын үкі» жарысында, мергендер сайыстарында, еліміз Қарулы Күштері барлау құрылымдарының жауынгерлік әзірлігінің жағдайын және белгіленген уақытта жауынгерлік тапсырманы орындау қабілеттілігін бағалау мақсатындағы байқауларда кәсіби дайындықтың жоғары деңгейін көрсетті. Әскери қызметті атқаруда артылған сенімді абыроймен ақтап, әрдайым тек кәсіби біліктілігін танытты. Құрметті демалысқа шығатын уақытқа дейін арнайы мақсаттағы барлау-шабуылдау ротасының старшинасы болды. Білікті маман – отбасының тірегі, өмірлік жары екеуі Айсұлтан, Бексұлтан, Жанель, Анель есімді төрт перзент тәрбиелеп отыр.
Әскери бөлімде барлығы 20 жыл және 8 ай қызмет етіп, Отан қорғау мамандығында зор жетістіктерге жеткен 3-сынып сержантын
әскери бөлім командирі подполковник Талап Бирбаланов құттықтады. Бөлім командирінің бірінші орынбасары – штаб бастығы подполковник Ернар Қалиев пен рота командирі майор Есен Сабыржанов та ізгі тілектерін білдірді. Арнайы мақсаттағы барлау-шабуылдау ротасының 2-ші арнайы мақсаттағы взводының шабуылдаушы бөлімшесінің аға маман-аға барлаушысы кіші сержант Дастан Жақашев өзі шығарған арнауын оқып беріп, қуаныш иесін марқайтып тастады.
Алуа Искакова
Суретті түсірген автор
