Жанар бала күннен әскери болуды армандады. Оның арманына қанат бітірген – туған ағалары. Ағаларына қарап бой түзеп өскен қыз көп ұзамай мақсатына қол жеткізді. Қазір әскери ортада сыйлы. Білгір маман.
«Алдыңғы арба қалай жүрсе, соңғы арба солай жүреді» деген сөз бар. Жанар – үйдің кенжесі. Аға-апаларынан үлгі алды. Алакөлдің тумасы кішкентай кезінен бәрін тоқып өсті. Әскери киімді киіп, бойын тіктеп жүретін ағаларына ұқсағысы келді. «Мен де әскери киім киіп, Отанымды қорғаймын» деген мақсат та болды. Осылайша, әскери ортаға қадам басты.
«Отбасында бес ағайындымыз. Үш ағам – ҚР Қарулы Күштерінің қызметшілері (қазіргі кезде әскери зейнеткер). Әпкем де бар. Ол – емхана мейірбикесі.
Бала күнгі арманыма қол жеткіздім деп айта аламын. Алғаш әскери ортаға 2007 жылы келдім. Осы жылы Астана қаласының ҚР ҚМ Байланыс әскеріне (55765 әскери бөліміне) шақырылдым. Сол күннен қазіргі кезге дейін қызмет етіп келемін», - деп бастады сөзін ол.
Қазіргі таңда кіші сержант Жанар Жүнісбекқызы – ҚР Қарулы Күштерінің әскери қызметшісі. Оның ҚР Қарулы Күштерінде қызмет етіп келе жатқанына – 18 жыл. Он сегіз жыл бойы әскери саланың қызығын да, шыжығын да татып келеді.
Бәріміз білеміз, қыз баласына, жалпы әйел затына әскери орта оңайға соқпасы анық. Ақыл мен күш-қайраттың арқасында талайы қиындықты еңсеріп жүр. Жанар да солардың қатарында. Бәрін жеңе жүріп, жетістіктерге қол жеткізді. Оны кеудесінде жарқыраған «Қазақстан Республикасы Қарулы Күштеріне – 20 жыл», ІІІ дәрежелі «Мінсіз қызметі үшін» , ІІ дәрежелі «Мінсіз қызметі үшін», «Қазақстан Республикасы Қарулы Күштеріне – 30 жыл», «Байланыс әскеріне – 100 жыл» төсбелгілерінен байқауға болады. Сонымен қатар, Жанар Жүнісбекқызы – бір емес, үш рет әскери парадқа қатысқан үздік әскери қызметші. Бүгінгі күніне ол «шүкір» дейді.
«Марқұм әкем Жүнісбек Қопабаев пен анам Мейізханға алғысым шексіз. Маған үлкен қолдау көрсетті. Балам Бақытты кішкентайынан бағып, алаңдамай жұмыс істеуіме жағдай жасады. Анама Алла ұзақ өмір берсін! Басымды иіп, рахметімді айтамын», - дейді сөз арасында ол.
Әрине, ана деген – әрдайым перзентінің қамқоршысы. Жанардың да анасының мерейін үстем етіп жүрген жайы бар. Еңбегінің арқасында «Отан қорғаушының анасы» төсбелгісін таққызып, көзайым етті. Кенже қыз осылай ерледі. Ана үмітінің ақталғаны осы шығар.
Көзі тірісінде атасының тегін алып, аманат еткен ұлы Бақыт Жүнісбек ержетіп, бүгінде Отан алдындағы борышын өткеріп жүр. Ол да осы әулеттен үлгі алып, текті перзент болады деген сенімдеміз.
Рима ӘБЕУОВА
