Қоғамда ешбір жанға зияны мен кесірі жоқ, тек мейірімін төгіп, әлемге шуағын шашып жүретін, жайсаң мінезді адамдар баршылық. Солардың бірі – Кеңес Одағының Батыры, Халық қаһарманы, Армия генералы Сағадат Нұрмағамбетов атындағы әскери колледжде 20 жылға жуық үздіксіз еңбек етіп келе жатқан Дүйсенгүл Ақанқызы Төлегенова.
Дүйсенгүл Ақанқызы – әскери колледждің асханасында ас таратушы болып жұмыс жасайды. Әскери колледждің жеке құрамы, кадеттер мен ұландар оны жай ғана «Дина апа» деп атап кеткен. Әскери колледж басшылығы Дина апаны өте құрмет тұтады, ал үйінен жырақта жүрген, әскери қызметтік өмірге қадам басып, қатал тәртіпке төселе бастаған кадеттер мен ұландар апаны ерекше қадірлеп, шын жүректерімен жақсы көреді. Апамыз асханада барлық тәрбиеленушілерге күніне төрт мезгіл ас мәзірі бойынша берілетін тамақтарды үлестіріп, таратып отырады. «Менің балаларым», «Айналайындар», «Қарақтарым аш қалып қалмасын» деп, ешкімді алаламай, бастарынан сипап, жылы сөзін жаудырып, аналық жүрегіндегі кең мейірімін төгеді.
Дүйсенгүл апа 1956 жылы 10 тамызда Жезқазған облысы, Ұлытау ауданында дүниеге келген. Әкесі Ақан шахтер болса, анасы жалғыз қызы Дүйсенгүлді босанып болған соң, кенеттен дүниеден өтіп кетіпті. Ал өзі болса әкесінің туған апасы Әлима әжесінің қолында өскен екен. 1975 жылы Арқар қаласы, Аңғар совхозының тұрғыны Бақытжан деген кісінің өмірлік жары атанып, 3 баланы дүниеге әкеледі. Ешқандай жоғары білім алуға мүмкіндігі болмаған апамыз қара жұмыстан қорықпай, тынбай еңбектенеді. 1976-1994 жылға дейін Арқалық қаласындағы Аңғар совхозында мектепте тазалықшы болып жұмыс жасайды. Ал, 1998 жылы балалары өскен соң, Астана қаласының шетінде орналасқан Қабанбай ауылына көшіп келеді. 2006 жылы «Жас ұлан» республикалық мектебіне алғашында тазалықшы болып, ал зейнетке шыққан соң ас таратушы болып жұмыс жасап келеді. Дина апа – өмірден көп қиыншылық көрген кейуана. 2000 жылы 48 жасында жолдасы қайтыс болған соң, жалғыз басты анаға 3 баланы аяққа тұрғызу оңай болған жоқ. Әз ғұмырында оны қандай тауқыметтер мен сынақтар күтіп тұрса да, Дина апа – шыдамдылық танытып, мойымай, оларды жеңе білген керемет жан. Әңгімелесу барысында Дина апа былай дейді: «Армия генералы Сағадат Нұрмағамбетов атындағы әскери колледж – мен үшін ыстық мекеме. Мұнда күллі Қазақстанның әр облысынан жиналған менің қаншама балаларым әскери оқуға түсіп, оны аяқтап, туған Отаны алдындағы борыштарын, әскери қызметтерін атқарып жүр. Мен оларды өз балаларымдай көремін».
Альмира Жабаева
