Темірдей тәртіпке бағынып, өз өмірін әскери қызметке арнаған нәзік жандылар көп, әрі олардың арасында ерлермен иық тіресе еңбек етіп жүргендер де аз емес. Солардың бірі – Мөлдір Еркінқызы Қонысбаева. 1991 жылы оңтүстік өңірдегі Жетісай қаласында дүниеге келген ол 2008 жылы жолдасымен танысып, отбасын құрады. Екеуі де – өз жақтарынан үйдің үлкендері. Жолдасы 2006 жылдан бері әскери қызметте қаржы саласында жүр. Ал, Мөлдір 2015 жылдан бері сапқа қосылып, елдің қорғаныс ісіне үлес қосып келеді.
Мөлдір Еркінқызының әріптестері оның жауапкершілігі, тиянақтылығы мен адалдығын ерекше атап өтеді. Ол – көпбалалы әскери ана. Отбасында үш қыз бен үш ұлды тәрбиелеп отыр. Өткен жылы Күміс алқа иегері атанды. Балаларының барлығы түрлі үйірмелерге қатысып, волейбол, бассейн, дзю-до, би, сурет салу сияқты салаларда жүлделі орындарды иеленуде. Мөлдір өзінің балаларының жетістіктеріне ерекше қуанып, оларды қолдап, бағыт-бағдар беріп келеді. Әрбір жетістік ата-аналарының қолдауы мен батасының арқасы екенін айтқан Мөлдір, жолдасының да отбасы мен қызметтегі жетістіктеріне қосқан үлесін ерекше бағалайды.
Мөлдір Еркінқызының өміріндегі ерекше сәттердің бірі – 9 мамыр Ұлы Жеңістің 80 жылдығына орайластырылған әскери парадқа іріктеліп алынуы. Бір қолымен бесікті тербеп, екінші қолымен қару ұстап, елін қорғаған ана ретінде Мөлдір өзін бақытты санайды.
