Ұлы Жеңістің 80 жылдығына 80 күн қалғанда қарт жауынгерлерге «Семей қаласының құрметті ардагері» атағы берілді. Майдангерлерді Абай облысы қорғаныс істері жөніндегі департаментінің әскерилері құттықтап барды.
Жуырда кеудесіне «Белоруссияны неміс-фашист басқыншыларынан азат еткеніне – 80 жыл» төсбелгісі тағылған Ұлы Отан соғысының ардагері, Халық қаһарманы Әбдіғали Қаймолдин енді «Семей қаласының құрметті ардагері» атағын алды.
Ол 1921 жылы 30 маусымда бұрынғы Семей облысының Абыралы ауданына қарасты Ұзынбұлақ ауылында дүниеге келген Әбдіғали Қаймолдин соғысқа еріктілер қатарында 20 жасында аттанды. Сталинград түбіндегі шайқаста жаяу әскердің алдыңғы шебіндегі артиллериялық құрамда снарядтарды тасушы, кейін оқтаушы болып, танкіге қарсы 76 миллиметрлік зеңбіректерден атыс жүргізді. 1942 жылдың қыркүйегінде ауыр жарақат алып, үш ай майдандық госпитальде жатқанына қарамастан қайта майданға сұранды. Харковьті азат етуге, 1-ші Украина, 3-ші Беларусь, Балтық жағалауы майдандарында жауынгерлік қимылдарға, Польшадағы ұрысқа және Инстербург пен Кенигсбергті алуға да қатысты. Ұрыс даласында төрт мәрте жарақаттанған офицер соғыстан кейін де Рижск әскери округінде, Семей сынақ ядролық полигонында НКВД СМЕРШ қарсы барлау бөлімінің құрамында стратегиялық құпия объектіні қорғауды қамтамасыз етуге қызмет етті. Отставкадағы подполковник Әбдіғали Қаймолдин – 103 жаста.
Бір ай бұрын 99 жасқа толған Иван Шевцов та «Семей қаласының құрметті ардагері» атанды. Алтай өлкесіндегі Антоновка селосының тумасы. Қызыл әскер қатарына шақырылып, Польша мен Чехословакияны азат етуге қатысқан. Майдан даласындағы ерліктері үшін «II дәрежелі Отан соғысы» және «Қызыл Жұлдыз» ордендерімен, «Адал еңбегі үшін» медалімен марапатталды. Соғыстан кейінгі жылдары «Қазэлектромонтаж» кәсіпорнында учаске бастығы болып еңбек етті.
Отанды неміс-фашист басқыншыларынан қорғаудағы жауынгерлік ерліктері үшін соғыс ардагерлеріне Абай облысы қорғаныс істері департаментінің басшылығы зор алғысын айтты.
Алуа Искакова
Суретті түсірген автор
