«Ауғанның асуында от кешкендер»

Бұл соғыс Ауған ардагерлерінің ғана емес, барлық  кейінгі ұрпақтардың жадында мәңгі қалады. Қазақстандықтар ауған әскери қақтығысына Кеңес әскери контингенті құрамында қатысты. 1979-1989 жылдар аралығында Ауғанстанға халықаралық борышын өтеу үшін Қазақстаннан жіберілген әскери қызметшілердің саны жиырма екі мыңнан асады. Біздің сарбаздарымыз бен офицерлеріміз Отанға және антқа адалдық танытып, батылдық, табандылық пен батырлық көрсетті. Олардың көпшілігі жауынгерлік ордендермен және медальдармен марапатталды. Ауғанстанда қаза тапқан қазақстандық жауынгерлерге ескерткіштер Алматы, Атырау, Қарағанды, Теміртау қалаларында, Ақмола облысы мен Қарқаралы ауданында (Қарағанды облысы) орнатылды.

2025 жылы 13 ақпан күні Кеңес Одағы Батыры, Халық қаһарманы, Армия  генералы Сағадат Нұрмағамбетов атындағы әскери колледжде 15 ақпан Кеңес әскерлерінің Ауған жерінен шығуына 36 жыл толуына орай Тәрбие және идеологиялық жұмыстар бөлімінің ұйымдастыруымен «Ауғанның асуында от кешкендер» атты іс-шара өткізілді. Іс-шараға Тәжік-Ауған шекарасы ұрыс қимылдарының ардагері ҚР Ауғанстан және жергілікті соғыс ардагерлері Одағының төрағасының орынбасары запастағы полковник Исмаилов Анвар Көптілеуұлы, Астана қаласы бойынша «Таулы  Карабахының ардагерлері мен мүгедектері» Одағының төрағасы, запастағы полковник Пшенбаев Нұрлан Макишұлы, ҚР Ауғанстан және жергілікті соғыс ардагерлері Одағының төрағасының орынбасары Кузербаев Айтуған Құлмахамбетұлы, ҚР Ауғанстан және жергілікті соғыс ардагерлері Одағының төрағасының орынбасары, Ауғанстан соғысында «Ерлік көрсеткені үшін» медалімен («Медаль за Отвагу») 2 мәрте марапатталған Омаров Қанат Қалиасқарұлы, Тәжік-Ауған шекарасы ұрыс қимылдарының ардагері, гвардия кіші сержанты Сейдахметов Нұрлан Досқалиұлы, Ж.Аймауытов атындағы №24 орта мектептің оқу ісі жөнінде меңгерушісі Кадирова Гүлмира Толкыновна, тарих пәнінің мұғалімі Исмаилова Гүлчехра Телемурадовна, алғашқы әскери дайындық пәні мұғалімі запастағы капитан Абишев Медет Хабидоллаевич пен осы мектептің оқушыларынан құралған «Астана гүлдері» би ансаблі құрметті қонақтар болып шақырылды. Салтанатты іс-шараны әскери колледж бастығының міндетін уақытша атқарушы полковник Хамит Бақдәулетұлы Байкенов ашып, іс-шараға келген Ауған соғысының ардагерлеріне үлкен ризашылығын білдірді. Іс-шарада арнайы дайындалған «Ауған соғысының әкелген қасіреті» атты мазмұны терең, тағылымы мол әсерлі бейнеролик көрсетілді. Іс-шараға арнап концерт те ұйымдастырылды. Фольклорлық  ансамбль «Адай» және «Балбырауын» күйін нақышына келтіріп орындаса,  триодан құралған топ домбыраның құлағында ойнап, қазақтың күйлерін орындап шықты. 3 оқу ротасының ұланы Олжас Ерден сөз өнерінің шыңы – көркемсөзді мәнерлеп, жүрекке жеткізіп оқыса, анасы Әсем Жанботақызы Ерденова қазақтың ұлттық аспабы қобызда ойнап көрерменді тебіренте білді. №24 мектептің «Астана гүлдері» би ансамблінің мың бұралған биші қыздары қонақкәде ретінде қазақтың ұлттық биі мен парсы елінің билерін орындап, көрерменді тамсандырды. 3 оқу ротасының жігерлі ұландары Қоянқолтық күрестің қарапайым тәсілдерін көрсетіп, қонақтарды жігерлендірді. Концерттің соңында 3 оқу ротасының ұландары, біздің өнерпаз қырандарымыз Әбу Баймахан мен Шайкамал Жанболаттың орындауында «Біз біргеміз!» атты патриоттық әні орындалды. №24 мектептің оқушылары өздері дайындаған «Нашақорлыққа жол жоқ! Балалар қылмысын алдын алу» атты бейнеролик көрсетті. Онда бүгінге дейін Ауғанстаннан Қазақстанға транзитпен келетін есірткі өнімдерінің әкелер зардаптары туралы ақпарат берілді. Іс-шара соңында запастағы Ауған соғысының ардагерлері полковник Исмаилов Анвар Көптілеуұлы мен Кузербаев Айтуған Құлмахамбетұлы ардагерлер атынан керемет сөз сөйлеп, әскери өмірге қадам басқан ұландар мен кадеттерге тарих бетінде өшпестей із қалдырған Ауған соғысында болған ұрыстардағы тар жол, тайғақ кешулердің адам төзгісіз қиындықтарын, бейбітшілік жолында жанын қиған боздақтардың ерліктері ешқашан ұмытылмайтындығын, сол бір қан төгіс, қанды қасап от кешуде қаза тапқан жауынгерлердің есімі мәңгі ұлықталу қажеттілігін, болашақ сарбаздарға өздерінің ағалық өсиеттері мен тілектерін  айтып өтті. Сонымен қатар, батыр ардагер ағалар қонақкәделерін де ұмытпай, әскери колледждің жүзден жүйрік, мыңнан тұлпар 3 үздік ұланына Тәжік-Ауған шекарасында ерлікпен қаза тапқан Раджан Батырканов атындағы «Батырдың аты өшпейді» төсбелгісімен 3 оқу рота ұландары Сәуіржан Саматұлын, Қуандық Нұрсұлтанұлы Қуандықты, 1 оқу рота ұланы Темірлан Ерланұлы Қаратаевты марапаттады. Әскери колледждің бастығы мен іс-шараны ұйымдастырушылар Ауғанстан және жергілікті соғыс ардагерлері Одағының төрағасының алғыс хаттарымен марапатталды. Жас ұландар  Ауған соғысынан аман келген, ерлік пен батылдықтың туын ұстаған ержүрек батыр ардагер ағаларымен естелікке суретке түсті. Әскери колледж басшылығы «Ауған асуында от кешкендер» атты іс-шараның жоғары деңгейде ұйымдастырылып өтуіне Тәрбие және идеологиялық жұмыстар бөлімінің мамандары запастағы майор Бахыт Қожахметқызы Сұлтанова, аға лейтенант Жарасова Салтанат Айтбекқызына ерекше ризашылықтары мен ілтипаттарын білдірді.

Альмира Жабаева

Армия  генералы С.Нұрмағамбетов атындағы әскери колледждің

Тәрбие және идеологиялық жұмыстар бөлімінің маманы