Қазақстан Республикасының Ұлттық қорғаныс университетінде аты аңызға айналған қолбасшы, Кеңес Одағының Батыры Бауыржан Момышұлын еске алу шарасы өтті.
Ұлттық қорғаныс университетінің Құрлық әскерлері факультетінде профессорлық-оқытушылар құрамы мен магистранттардың қатысуымен дөңгелек үстел өткізілді.
– Бауыржан Момышұлы – Ұлы Отан соғысының батыры, көрнекті әскери қолбасшы ғана емес, ол шын мәнінде әскери өнер туралы баға жетпес құнды еңбектер жазған алғашқы қазақ ғалымы. Ол – стратег, философ әрі психолог. Батырдың мұрасы ұрпақтан ұрпаққа жалғаса береді, - деп атап өтті Ұлттық қорғаныс университеті бастығының орынбасары генерал-майор Самат Төлепбаев.
Іс-шараға қатысушылар Бауыржан Момышұлының өмірі мен әскери мансабына қатысты қызықты деректер келтірді. Мәскеу шайқасының жауынгерлік эпизодтарын талқылау кезінде батырдың қимылы командирдің табысын қамтамасыз еткен жекпе-жекті ұйымдастыруға шығармашылық көзқарасының үлгісі ретінде әскери тарихқа енгені атап өтілді.
Сөз алғандар Бауыржан Момышұлының таланты ұрыс даласында да, жауынгерлерді патриоттық тәрбиелеу ісінде де көрінгеніне ерекше тоқталды.
Іс-шара аясында ҚР Ұлттық қорғаныс университетінің кітапханасы кітап көрмесін ұйымдастырды. Оған қолбасшының кітаптары мен Бауыржан Момышұлы мұрасын зерттеушілердің еңбектері кірді.
