Жетісу облысының Текелі қаласында шақыру пункті пайдалануға берілді. Қала әкімдігі бөлген нысан күрделі жөндеуден кейін пайдалануға беріліп отыр. Ғимаратта әскерге шақырылушы жастарды зерделеу мен медициналық тексеруден өткізу үшін барлық жағдай жасалған.
Шақыру пунктінің ашылу салтанатына қала әкімінің орынбасары Сержан Құрманбаев, қалалық ардагерлер кеңесінің төрағасы Ертай Дүйсебаев, жергілікті гарнизонның әскери қызметшілері мен Қарулы Күштердің ардагерлері қатысты.
– Әкімдіктер мен жергілікті әскери басқару органдары жұмылдыру резервін дайындау бойынша тұрақты негізде жұмыс жүргізуде. Енді Текелі қаласының жастары осы жерде медициналық комиссиядан өтіп, одан әрі облысқа жіберілетін болады, - деп түсіндірді Ескелді және Көксу аудандары Қорғаныс істері жөніндегі біріккен бөлімінің бастығы подполковник Дидар Нұртөлеуұлы.
Биылғы жылдың мамыр айында басталған жөндеу жұмыстары қыркүйекте толығымен аяқталды. Әскерге шақырылушыларды қабылдау пунктінде және медициналық комиссия кабинеттерінде әскерге шақырылушы азаматтарға рәсімдер жүргізу үшін барлық жағдай жасалған.
