Жаңа шаралар Ресей экономикасының энергетика, қаржы және сауда сияқты секторларына бағытталған
Еуропалық кеңес Ресейге қарсы экономикалық және жеке санкциялардың 14-ші пакетін қабылдады. Бұл туралы Sarbaz.kz тілшісі BBC агенттігіне сілтеме жасап хабарлайды.
Жаңа шаралар Ресей экономикасының энергетика, қаржы және сауда сияқты секторларына бағытталған және ЕО-ның қолданыстағы санкцияларын айналып өтуді одан сайын қиындатады, делінген кеңес мәлімдемесінде.
«Санкцияларымыз қазірдің өзінде Ресей экономикасын айтарлықтай әлсіретіп, Путинге Украинаны жою жоспарын жүзеге асыруға кедергі келтірді. Алайда ол әлі де бейбіт тұрғындар мен азаматтық инфрақұрылымдарға қарсы заңсыз агрессиясын жалғастыруда. Санкциялардың 14-ші пакеті Украинаны қолдаудағы және Ресейдің украиндарға қарсы қылмыстық әрекеттерін, оның ішінде Еуроодақ санкцияларын айналып өту әрекеттерін шектеуге ұмтылудағы бірлігімізді көрсетеді», - деді ЕО-ның сыртқы істер және қауіпсіздік саясаты жөніндегі жоғарғы өкілі Жозеп Боррель.
Жаңа пакет Украинаның аумақтық тұтастығына, егемендігі мен тәуелсіздігіне нұқсан келтіретін немесе қауіп төндіретін әрекеттерге жауапты тағы 116 жеке және заңды тұлғаға қатысты шектеу шараларын қамтиды, делінген құжатта.
Жаңа шектеулердің қатарында Ресейдің сұйытылған табиғи газын үшінші елдерге жөнелту үшін ЕО аумағында ауыстырып тиеу қызметтеріне тыйым салу мәселесі де бар. Бұл кемеден кемеге және кемеден жағаға ауыстырып тиеуге де қатысты және импортқа әсер етпейді, тек ЕО арқылы үшінші елдерге қайта экспортталады.
ЕО-ның бас компаниялары өзге елдердегі еншілес компанияларының санкцияларды айналып өтетін әрекеттермен айналыспауын қамтамасыз етуі керек.
Ресейлік әскери жүйелерді дамыту үшін маңызды әскери техниканың реэкспортына қарсы тұру мәселесі де қарастырылған. Ол бойынша үшінші елдерге әскери техника сататын еуропалық компаниялар Ресейге реэкспорт тәуекелдерін анықтауға, бағалауға және азайтуға қабілетті механизмдерді енгізуі қажет.
ЕО-дағы саяси партиялар мен қорларға, үкіметтік емес ұйымдарға, оның ішінде сараптамалық орталықтарға және БАҚ қызметтерін жеткізушілерге бұдан былай Ресей мемлекеті мен оның делдалдарынан қаржыландыруды қабылдауға рұқсат етілмейді.
ЕО сондай-ақ Ресейдің Украинаға қарсы әскери әрекетіне қатысқан нақты кемелерге қатысты алғаш рет шара қолданып, олардың порттарға кіруіне және қызмет көрсетуіне тыйым салды.
ЕО сондай-ақ Ресейдің өнеркәсіптік әлеуетін нығайтуға көмектесетін тауарлардың экспортына қосымша шектеулер енгізді.
Еуропа Одағы Украинаға қарсы соғыста Ресейдің әскери-өнеркәсіп кешенін тікелей қолдайтындар тізіміне 61 жаңа ұйымды қосты. Оларға қосарлы мақсаттағы тауарлар мен технологияларды экспорттауға қатаң шектеулер қойылады.
