Ал Севастопольде төтенше жағдай режимі енгізілді
Севастополь мен Қырымда Украина қарулы күштерінің зымырандық шабуылынан қаза тапқандар үшін аза тұту күні жарияланды. Ал Одессада жарылыс болды. Ресей әскери күштері қалаға соққы жасады. Бұл туралы Sarbaz.kz тілшісі Euronews агенттігіне сілтеме жасап хабарлайды.
Украинаның атқылауына байланысты Севастопольде төтенше жағдай режимі енгізілді. Мұндай бұйрықты дүйсенбі күні Ресей аннексиялаған Қырым қаласының басшысы, Мәскеу тағайындаған Михаил Развожаев жасады. Оның айтуынша, Украина қарулы күштерінің жексенбі күнгі зымырандық шабуылы нәтижесінде төрт адам қаза тапты, оның екеуі – бала. 151 адам зардап шекті. Оның 82-сі ауруханаға жатқызылды.
Ресей қорғаныс министрлігі Украина бес америкалық ATACMS зымыранын ұшырғанын хабарлады. Олардың төртеуі атып түсірілді, біреуі «әуе шабуылына қарсы қорғаныс жүйесінің әсерінен траекториясынан ауытқып кетті» және демалушылар көп болатын Учкуевка жағажайына құлады.
Ведомство Украина мен Америка Құрама Штаттарының «бейбіт тұрғындарға қасақана зымырандық шабуыл жасағаны үшін жауапты» деп мәлімдеді.
Развожаев дүйсенбі күні Севастопольде қаза тапқандарды аза тұту күні деп жариялады. Әлеуметтік шаралар тоқтатылды.
