Жапония Ресейдің 50-ден астам компаниясына санкция салды
Жапония Ресейге тауар тасымалдады деген айыппен Қытай, Үндістан, Қазақстан және өзге де елдердің ондаған фирмасына санкция салды. Бұл туралы Sarbaz.kz тілшісі BBC агенттігіне сілтеме жасап хабарлайды.
Жапония Ресейдің 50-ден астам компаниясын, мекемелерін және жеке тұлғаларын, сондай-ақ Қытай, Үндістан, Қазақстан және басқа елдердің фирмаларын қамтып, санкция салды. Бұл фирмаларға Ресейге санкцияларды айналып өтуге және қару-жараққа қажетті электроника сатып алуға көмектесті деген айып тағылды.
Жапония үкіметінің санкциялар тізіміне Ресейдің 11 адамы, 42 компаниясы мен ұйымы кірді.
Жеке тұлғалар арасында жапониялық санкцияға орталық сайлау комиссиясының бірнеше мүшесі мен кейбір әскери-өнеркәсіптік компаниялардың басшылары кірді.
Санкциялық тізімнің Қытайға тиесілі бөлігіне Ресейге электроника сататын жеті компания кірді.
Өткен аптада АҚШ Ресейге тауар сататын қытайлық фирмаларға қарсы санкция салды.
