Олар бес жылға дейiнгi мерзiмге бас бостандығынан айырылуы мүмкін
СҚО-да әскер қатарына алынып, бөлімге кетіп бара жатқан екі жігіт қашып кеткен. Осы факті бойынша қылмыстық іс қозғалды. Бұл туралы Sarbaz.kz тілшісі СҚО Қорғаныс істері жөніндегі департаментке сілтеме жасап хабарлайды.
Департамент мәліметінше, 2024 жылғы 27 сәуірде сағат 19.39-да жаңадан шақырылған мерзімді әскери қызметшілерді Петропавл қаласының стансасындағы Қарағанды облысының 85510 әскери бөліміндегі қызмет орнына жіберу кезінде екі әскери қызметші рұқсатсыз Самара-Қарағанды вагонынан шығып, белгісіз бағытта жоғалып кеткен:
Коваленко Владислав Александрович 2004 жылы 18 қыркүйекте дүниеге келген.
Құсайынов Бақтияр Бауыржанұлы: 21.09.2003 жылы туған.
«Азамат әскери қызметке шақыру туралы облыстың немесе республикалық маңызы бар қаланың, астананың жергілікті әскери басқару органы бастығының бұйрығы шыққан кезден бастап әскери қызметке шақырылды деп есептеледі. Әскери қызметші қызмет орнына бару және кері қайту кезінде де әскери қызмет міндеттерін атқарады.
СҚО Қорғаныс істері жөніндегі департаменті бастығының 2024 жылғы 27 сәуірдегі №67 бұйрығына сәйкес бұл азаматтар мерзімді әскери қызметке шақырылып, оларға «қатардағы жауынгер" әскери атағы берілді, 85510 әскери бөліміне әскери қызмет өткеру үшін жіберілді», - делінген хабарламада.
Қылмыстық кодекстің 441-баптың 2-тармағы бойынша адамдар тобының немесе адамдар тобының алдын ала сөз байласуы бойынша қызмет бiрлiгiн немесе орнын өз бетiнше тастап кету, егер рұқсатсыз келмеу бiр тәулiктен астам уақытқа созылса, бес жылға дейiнгi мерзiмге бас бостандығынан айыру жазасы қолданылады.
Ал 442-баптың 2-тармағы бойынша дезертирлеу, яғни әскери қызметтен жалтару мақсатында бөлімді немесе қызмет орнын өз бетінше тастап кету, сол сияқты сол мақсатта қызметке келмеу – бес жылға дейінгі мерзімге бас бостандығынан айыруға жазаланады.
Аталған факті бойынша қылмыстық іс қозғалды.
