«Қазгидромет» РМК мәліметінше, 30 сәуір күнгі сағат 08.00-дегі жағдай бойынша Тайпақ гидробекетінде су деңгейі 665 сантиметрге жетті
Жайық өзеніндегі су деңгейі Ақжайық ауданы Тайпақ ауылы тұсында бір тәулікте 32 сантиметрге көтерілді, деп хабарлайды Sarbaz.kz.
«Қазгидромет» РМК БҚО филиалының 30 сәуір күнгі сағат 08.00-дегі мәліметі бойынша Тайпақ гидробекетінде су деңгейі 665 сантиметрге (қауіпті шегі – 850 см) жетті.
Жайық өзенінің суы Январцев ауылы мен Орал қаласы тұсында бір тәулікте 10 сантиметрге төмендеді. Январцевте 834 (қауіпті шегі – 1 250 см), облыс орталығында 828 (850 см) сантиметрді көрсетті. Сондай-ақ Көшім ауылында су деңгейі қауіпті шектен 10 сантиметрге төмен (840 см).
Ақжайық ауданының әкімі Мұрат Сердалиннің айтуынша, Жайық өзенінің суы сай-салаларды толтырып, төмен қарай ағып жатыр. Өзен бойындағы елді мекендер бақылауда.
