Су басқан аймақтардан барлығы 97 мың тұрғын эвакуацияланды
Еліміздің батыс өңірін үлкен судан қорғау үшін 10 мыңнан аса әскери қызметші жұмылдырылды. Бұл туралы Үкімет басшысы Олжас Бектенов Су тасқынына қарсы іс-шараларды үйлестіру және су тасқыны салдарын жою жөніндегі республикалық штабтың жұмыс кеңесінде мәлімдеді, деп хабарлайды Sarbaz.kz тілшісі Премьер-министрдің баспасөз қызметіне сілтеме жасап.
Кеңесте вице-премьер, штаб жетекшісінің орынбасары Қанат Бозымбаев Ресей Федерациясынан Жайық өзені арқылы көлемді судың күтіліп отырғаны туралы баяндады.
Фото: Премьер-министрдің баспасөз қызметі
Батыс Қазақстан облысында жаңбыр жауады. Сақмар өзенінің деңгейі көтеріле бастады. Болжам бойынша, Жайық және Сақмар өзендерінің жоғарғы жағынан сәуір айының екінші онкүндігінде Батыс Қазақстан облысының аумағына су келеді. Қазіргі уақытта Орал қаласындағы Жайық өзеніндегі су деңгейі – 728 см, ол 850 см қауіпті межеге жақындайды деп болжанып отыр.
Батыс Қазақстан облысынан судың келуіне байланысты Атырау облысында өткен тәулікте Жайық өзеніндегі гидробекеттерде де су деңгейінің біраз көтерілуі байқалған. Сәуірдің үшінші онкүндігінде үлкен судың келеді деген болжам бар.
Үкімет басшысы Олжас Бектеновтің тапсырмасы бойынша оның Батыс Қазақстан және Атырау облыстарына жұмыс сапарларының қорытындысына сәйкес әкімдіктердің, ТЖМ, ІІМ және Ұлттық ұланның, Қорғаныс министрлігінің күштері мен құралдары жұмылдырылды.
Батыс Қазақстан облысында апаттық-құтқару жұмыстарын жүргізу үшін күштік құрылымдар 6 мың адамға, Атырау облысында 4 мың адамға дейін жеткізіледі. Еліміздің әр өңірінен 4 мыңға жуық техника жіберілді.
Премьер-министр Қорғаныс және Ішкі істер министрлеріне қажет болған жағдайда қосымша жеке құрам мен техника жіберуді тапсырды.
«Орал мен Атырау бойынша күштер мен құралдарды барынша жұмылдыру қажет. Қазір үлкен суды елдімекендерге жеткізбей, бұрып әкету маңызды. Бүгін қосымша әскери қызметшілер мен техника жіберіле бастады. Су ағысының қарқынын ескере отырып, бірінші кезекте Оралды, одан әрі Атырауды күшейтеміз», - деді Олжас Бектенов.
Үкімет басшысы екі облыс әкімдіктеріне жөнелтілген әскери қызметшілерді барлық қажетті заттармен қамтамасыз ету, сондай-ақ техникаға жанармай құю мәселесін шешу жөнінде тапсырма берді.
Бүгінгі таңда сегіз облыста жергілікті ауқымдағы төтенше жағдай режимі жалғасуда. Су басқан аймақтардан барлығы 97 мың тұрғын эвакуацияланды. 11 сәуірдегі жағдай бойынша Павлодар және Абай облыстарында су тасқыны жағдайының тұрақтануына байланысты ТЖ режимдері алынып тасталды.
