Оған желіде алқабилердің фото және видеолары жарияланғаны себеп болды
Бүгін экс-министр Қуандық Бишімбаевтың ісі бойынша БАҚ өкілдері сот залынан шығарылды. Бұған желіде пайда болған алқабилердің видеосы себеп болды, деп хабарлайды Sarbaz.kz.
Бүгінгі сот отырысында судья Айжан Құлбаева 9 сәуірде сот отырысынан кейін БАҚ пен әлеуметтік желілерде алқабилердің фото және видеолары пайда болғанын айтты. Бұл үшін Жоғарғы Соттың нормативтік қаулылары бойынша жауапкершілік қарастырылған.
«Осындай фактілерді және алқабилермен процестік емес байланысты болдырмау мақсатында және сот төрелігі мақсатында сот бұқаралық ақпарат құралдарына, әлеуметтік желілерге және жеке тұлғаларға Интернет желісінен алқабилер соты бейнеленген фото және видеоны алып тастауды міндеттеуге қаулы етеді. Қылмыстық істі объективті және тиісінше қарау мақсатында тексеру нәтижелерін алғанға дейін Сот сот отырысы залынан барлық БАҚ-ты, сот ғимаратындағы арнайы бөлінген үй-жайдан трансляция жүргізе алатын барлық өкілді алып тастау қажет деп санайды. Ал залдағы барлық қатысушыларды БАҚ-та және әлеуметтік желілерде алқабилердің фотосуреттері мен бейнелерін жариялауға жол бермеу туралы тағы да ескертемін», - деді судья.
