Бюджет қаражатын жымқырған: «ҚазАвтоЖол» компаниясының бұрынғы басшысы ұсталды

Астана қаласы бойынша Экономикалық тергеп-тексеру департаментімен Бас көлік прокуратурасының жұмыс үйлестіруімен бір көзден алу жолымен бюджеттік қаражатты аса ірі мөлшерде жымқыру күдігімен «ҚазАвтоЖол» ҰҚ» АҚ-ның экс-басқарма төрағасы А.Мұратұлы ұсталды. Бұл туралы Sarbaz.kz Қаржылық мониторинг агенттігіне сілтеме жасап хабарлайды.

Ведомство мәліметінше, сотпен күдіктіге қатысты 2 ай мерзімге «күзетпен ұстау» түріндегі бұлтартпау шарасы санкцияланды.

«ҚР ҚПК 201 бабына сәйкес, өзге мәлімет жариялануға жатпайды», - делінген хабарламада.

Асқар Мұратұлы 1976 жылы дүниеге келген. Абай облысының тумасы. Шығыс Қазақстан техникалық университетін (инженер-экономист) және Л.Гончаров атындағы Қазақ автомобиль-жол университетін (инженер) тәмамдаған.

• Еңбек жолын 1998 жылы Шығыс қазақстан облысы сауда және қызмет көрсету департаментінің инспекторы болып бастаған. Әр жылдары «Қазақавтожол» РМК Қостанай, Қарағанды, Павлодар облыстық филиалдарының директоры болып қызмет еткен.
• 2007-2012 жылдары – Астана қаласы Жолаушылар көлігі және автомобиль жолдары басқармасы бастығының орынбасары, ҚР Көлік және коммуникация министрлігінің сарапшысы, Жамбыл облысы бойынша Қаржылық бақылау инспекциясы бастығының орынбасары қызметтерін атқарды.
• 2012-2015 жылдары – Ақмола облысы жолаушылар көлігі және автомобиль жолдары басқармасының басшысы.
• 2015-2017 жылдары — Зеренді ауданының әкімі.
• 2017-2019 жылдары – Ақмола облысы жолаушылар көлігі және автомобиль жолдары басқармасының басшысы.
• 2019-2021 жылдары – Ақмола облысы әкімінің орынбасары.
• 2021-2022 жылдары – «ҚазАвтоЖол» ҰҚ» АҚ басқарма төрағасы.