Жер сілкінісі жергілікті уақыт бойынша таңғы сағат 07:58-де
Тайванның шығыс жағалауында 7,4 балдық жер сілкінісі болды. Арал мен көрші елдерге цунами қаупі туралы ескерту жарияланды. Бұл туралы Sarbaz.kz тілшісі BBC агенттігіне сілтеме жасап хабарлайды.
АҚШ геологиялық қызметінің мәліметінше, жер сілкінісінің ошағы Тайваньның Хуалянь қаласынан оңтүстікке қарай 18 шақырым жерде орналасқан. Сейсмологтардың айтуынша, бұл Тайваньда соңғы 25 жылда болған ең күшті жер сілкінісі.
Хуаляньда көптеген ғимараттар қирап, онда құтқарушылар жұмыс істеп жатыр. Ел астанасы Тайбэйде де ғимараттар қатты сілкінді.
Тайвань ұлттық өртке қарсы агенттігінің хабарлауынша, әзірге Хуалянь маңындағы ұлттық саябақта бір адам қаза тауып, тағы үш адам жараланды, ал басым бөлігі үңгірлерде қалып қойды.
Тайваньдық БАҚ ғимараттардың қирап жатқанын және мектептер мен үйлерден адамдардың эвакуацияланғанын хабарлады.
Аралда электр қуаты үзіліп, интернет желісі ажырап жатыр, деп хабарлайды Netblocks мониторинг қызметі.
Жер сілкінісінен кейін көп ұзамай Жапония мен Филиппинде цунами қаупі туралы ескерту жарияланды. Жапонияның метеорологиялық агенттігі кейінірек ескерту деңгейін төмендетті, бірақ әлі де осындай магнитудалық дүмпулер бір аптаға дейін жалғасуы мүмкін екенін және жұртшылық сақ болуы керек екенін айтты.
Тынық мұхитындағы цунами туралы ескерту орталығы жер сілкінісінен екі сағат өткен соң қауіп сейілгенін хабарлады.
Қытайдың мемлекеттік ақпарат құралдары жер сілкінісінің елдің оңтүстік-шығысындағы Фуцзянь провинциясында да сезілгенін мәлімдеді.
«Жер сілкінісі аралға жақын жерде, таяздау жерде басталды. Ол бүкіл Тайвань мен көршілес аралдарда сезілді. Бұл – соңғы 25 жылдағы ең күшті жер сілкінісі», - деді Тайбэй сейсмология орталығының басшысы У Чиэнь Фу.
Тайвандық TSMC компаниясы Синьчжудағы және аралдың оңтүстігіндегі бірнеше зауытынан қызметкерлерін эвакуациялағанын, бірақ қауіпсіздік жүйелері қалыпты жұмыс істеп тұрғанын айтты. Бұл зауыт Apple мен Nvidia сияқты компаниялар үшін чиптер шығарады.
Аралдың ішкі бөлігінде жер бедері өте таулы. Әлеуметтік желідегі кадрларға қарағанда, жер сілкінісінен үлкен көшкін туындаған. Алайда зардаптардың ауқымы әлі белгісіз.
Айта кетейік, 1999 жылы қыркүйекте Тайваньда 7,6 балдық жер сілкінісі болды. Салдарынан 5 мыңнан астам ғимарат қирап, 2400 адам қаза болды.
Қазіргі жер сілкінісі жергілікті уақыт бойынша таңғы сағат 07:58-де (GMT 23:58) болды, ошағы 15,5 км тереңдікте орналасқан. Бұдан кейін магнитудасы 4 немесе одан жоғары кем дегенде тоғыз афтершок болды.
