Жаңа әдіс: енді букмекерлік ұтыстан да алимент өндірілетін болады

Қазақстандықтардың алимент бойынша 20 миллиард теңгеден астам қарызы бар. Бұл туралы Әділет министрлігінің ресми өкілі Талғат Уәли мәлімдеді, деп хабарлайды Sarbaz.kz.

Жалпы сомасы 1 млрд 938 млн теңгені құрайтын қарыз бойынша Алматы облысы республикада көш бастап тұр. Жаңа тетіктер бойынша алимент әртүрлі кіріс көздерінен өндірілетін болады.

«Бұған дейін алимент тек жалақы шотынан өндірілетін. Енді біз тек жалақы ғана емес, басқа да кірістер алатын механизмді қосымша енгіздік. Дереккөздер электрондық әмияндардан, букмекерлік компаниялардан, акциялар мен бағалы қағаздар арқылы саудадан, криптовалюта операцияларынан және желілік маркетингтен алынған кірістерді қамтиды. Бұған дейін бұл есепшоттардан алимент өндірілмеген», – дейді Талғат Уәли.

Қарыздарды өтеу үшін борышкердің мүлкіне тыйым салынуы мүмкін. Осылайша, республика бойынша 329 автокөлік тәркіленді. Меншік иелерінен 224 миллион теңгеден астам қаржы өндірілді.

Бұл ретте Әділет министрлігі алаяқтардың арбауына түспеуге шақырады. Соңғы кездері мұндай жағдайлар жиілеп кетті. Жалған қызметкерлер өздерін сот орындаушысы ретінде көрсетіп, қарызды өтеуді талап етеді. Әйтпесе, олар есептік жазбаларды, мүлікті және т.б. блоктау туралы хабарлайды.

Мұндай қоңырау немесе хабарлама алған жағдайда Әділет министрлігінің, республикалық және облыстық жеке сот орындаушылар палатасының сайтындағы ақпаратты өз бетінше тексеруі, қажет болған жағдайда банкке хабарласуы қажет.

Атқарушылық іс жүргізудің бар екендігі туралы ақпаратты тексеру үшін сізге мыналар қажет:

• Браузеріңіздің іздеу жолағына AIS OIP (Атқарушылық іс жүргізу органдарының автоматтандырылған ақпараттық жүйесі) деп жазыңыз;
• «Борышкерлер мен тыйым салулар тізілімі» бөлімін таңдаңыз;
• ЖСН енгізу;
• Ұқсас іздеуді AIS OIP қосымшасында жүргізуге болады.