Шерушілер жолдарды жауып, көлік қозғалысын шектеген
Тель-Авивте әскери штаб ғимаратының жанында ХАМАС тобымен кепілге алынғандарды босату туралы келісімге келуді талап еткен шерулер өтті, деп хабарлайды Sarbaz.kz тілшісі The Times of Israel басылымына сілтеме жасап.
Наразылық акциясы нәтижесінде кемінде 4 адам қамауға алынды, олардың арасында ХАМАС ұрлаған адамдардың туыстары да бар.
Израиль астанасындағы наразылықтар Қатардағы Израиль мен ХАМАС арасындағы келіссөздер сәтсіз аяқталғаннан кейін басталды. Кейбір шерушілер жолдарды жауып, көлік қозғалысын шектеген.
Израиль ақпарат құралдарының хабарлауынша, ұсталғандардың екеуі ХАМАС мүшелері 7 қазанда анасы, атасы және әжесімен бірге ұрлап кеткен тоғыз жасар Охад Мандер-Зихри есімді баланың туыстары. Бала мен оның анасы және әжесі қараша айында уақытша бітім аясында босатылды, ал атасы Газа секторында әлі тұтқында жатыр.
Ұсталғандар туралы білген Израиль оппозициясының жетекшісі Яир Лапид билік кепілге алынғандардың отбасыларына көбірек жанашырлық танытуы керек деді.
Премьер-министр Беньямин Нетаньяху ХАМАС-пен келіссөздер қайта үзілгендіктен қатты қысымға ұшырады. 7 қазандағы содырлардың шабуылынан кейін ХАМАС қозғалысын жоюға ашық уәде берген Израиль билігі Газа секторындағы шабуылды жалғастыруда. Нетаньяху ХАМАС-тың атысты тоқтату және әскерді шығару туралы талаптарын бірнеше рет қабылдаған жоқ және оларды «алданушылық» деп атады.
Газада әлі де 130 адам тұтқында отыр. Олардың арасында 34 адам қаза тапты.
