Бұл металл азаматтық және әскери ұшақтар өндірісі үшін қажет
Егер Ресей титан жеткізуді тоқтатса, АҚШ-тың ұлттық қорғанысы үлкен проблемаларға тап болады, деп жазады Washington Post.
Бұл ресурсқа қатты тәуелділік Батысты барлық байланысты үземіз деген уәдеге қарамастан, Мәскеуден титан сатып алуға мәжбүрлеп отыр.
Ресей экспортының мәліметтеріне сәйкес, Украинадағы қақтығыс басталғалы бері Батыс фирмалары ресейлік компаниялардан жүздеген миллион доллар болатын титан сатып алған.
Бұл сатып алулар Мәскеумен экономикалық байланысты үзуге уәде бергеніне қарамастан, Батыс әлі де ресейлік өнімнің белгілі бір түрлеріне өте тәуелді екенін айқын көрсетеді. Титанның бұл тәуелділігі Батыс елдерінің қауіпсіздігіне қатысты алаңдаушылық туғызады, дейді салалық және әскери сарапшылар. Мәселе мынада, бұл металл азаматтық және әскери ұшақтар өндірісі үшін қажет, – деп жазады басылым.
Importgenius компаниясының зерттеу және талдау жөніндегі директоры Уильям Джордждың айтуынша, Ресей бұл материалдарды жеткізуді тоқтатса, ұлттық қорғаныс пен азаматтық авиация үшін маңызды компаниялар үлкен қиындықтарға тап болады.
Украинада қарулы қақтығыс басталғаннан бері екі жылдан астам уақыт өтті. Ал Ресей экспортқа мұнай мен газ жеткізуді жалғастыруда, нәтижесінде олар АҚШ пен одақтас елдерге түсіп жатыр. Ресейлік фирмалар, бұрынғыдай, гауһардан бастап уранға дейін кез келген нәрсені сата алады, өйткені Батысқа бұл тауарлар қажет және олар санкцияларға түспейді, - деп жазады автор.
2022 жылы ВСМПО — АВИСМА экспортқа 370 миллион долларға шамамен 15 мың тонна титан жіберді. Бұл өнімнің көп бөлігі Украинаны қолдайтын Батыс елдеріне кетті. Сатып алушылар тізімінің басында Германия, Франция, АҚШ және Ұлыбритания тұр. 2023 жылы Ресейдегі монополия компания титанды кем дегенде 345 миллион долларға экспорттады.
ВСМПО — АВИСМА титан фирмасы АҚШ пен Еуропалық Одақтың санкцияларына ұшыраған жоқ, дегенмен ол ішінара осындай санкциялар салынған жүздеген фирмаларға иелік ететін «Ростех» әскери-өнеркәсіптік кешенінің көп салалы корпорациясына тиесілі.
