Украинаға бағытталған зымырандардың бірі Польшаның әуе кеңістігіне кіріп кеткен
Жексенбіге қараған түні Ресей Украинаға кезекті жаппай шабуыл жасады. Польша билігі зымырандардың бірі елдің әуе кеңістігіне кіріп кеткенін мәлімдеді, деп хабарлайды ВВС сайты.
Украина Әскери-әуе күштерінің мәліметі бойынша, түнде Украинаға 29 қанатты зымыран ұшырылды, оның 18-і қағып түсірілді. Сондай-ақ Шахед типті 28 дрон (25-і атып түсірілді) шабуыл жасады.
Киев қалалық әскери басқармасының мәлімдемесіне сәйкес, Украина астанасының әуесінде 10 шақты қанатты зымыран атып түсірілген.
Ал Польша әскерінің мәлімдесіне сәйкес, Украинаның батысындағы қалаларға атылған ресейлік қанатты зымырандардың бірі Польшаның әуе кеңістігін бұзған.
Объект Польшаның әуе кеңістігі арқылы Осьердов ауылының (Люблин воеводствосы) үстінен ұшып өтті. Ол 39 секунд бойы сонда болды, - делінген Польша қарулы күштерінің қолбасшылығының хабарламасында.
Әскерилер «Польша әуе кеңістігінің қауіпсіздігін қамтамасыз ету үшін барлық қажетті шаралар қабылданғанын», соның ішінде «Польша мен одақтас авиацияның жұмыс істегені» туралы айтты.
Ресей әзірге бұл мәлімдемелерге түсініктеме бермеді.
Біз бұған дейін Польша өзінің шығыс шекарасында әскер санын көбейтіп жатқанын жазған едік.
