SpaceX жаңа тыңшылық спутниктер желісін құру үшін АҚШ барлау қызметімен 1,8 миллиард долларлық келісімшарт жасады
Илон Масктың SpaceX компаниясы АҚШ-тың Ұлттық ғарыштық барлау басқармасымен (NRO) құпия келісімшарт аясында жүздеген барлау спутниктерінің желісін құру үстінде, деп хабарлайды dw.com сайты.
Жобаны SpaceX-тің Starshield деп аталатын бөлімшесі жүзеге асырады. 2021 жылы NRO-мен 1,8 миллиард долларлық келісімшартқа қол қойылған.
Егер бағдарлама сәтті болса, АҚШ әкімшілігі мен Қарулы Күштерінің Жер шарының кез келген жерінде ықтимал нысандарды жылдам анықтау мүмкіндіктері айтарлықтай кеңейтіледі.
Ақпан айында The Wall Street Journal Starshield компаниясының белгісіз барлау агенттігімен 1,8 миллиард долларлық құпия келісімшартының бар екендігі туралы жазған еді. Алайда бағдарламаның мақсаттары белгісіз болған.
Жаңа спутниктік желі төмен орбитада қашан жұмыс істей алатыны белгісіз. Сонымен қатар жобаға өз келісімшарттарымен тағы қандай компаниялар қатысатыны нақтыланбады.
