Ол заң мен тәртіп үстемдік етуі керектігін айтып өтті
Мемлекет басшысы Қасым-Жомарт Тоқаев Ұлттық құрылтай отырысында қоғамда күшейіп бара жатқан қатігездік мәселесін қозғады, деп хабарлайды Sarbaz.kz Ақорданың баспасөз қызметіне сілтеме жасап.
«Тұрмыстық зорлық-зомбылық, буллинг пен агрессия да қазіргі уақыттағы қатерлі үрдіс. Ашығын айтсақ, қоғамда қатігездік күшейіп барады. Біреуге тіл тигізіп, ар-намысын таптап, тіпті, ұрып-соғуға дайын тұратындар аз емес.
Жедел жәрдем және қоғамдық көлік жүргізушілеріне шабуыл жасалғанын білесіздер. Адамға әлімжеттік көрсету, қорлау дұрыс емес. Мұндай теріс әрекеттерге көз жұма қарауға болмайды. «Ауруын жасырған өледі». Сондықтан біз осы қоғамдық дертті жасырмай, ашық айтуымыз керек», - дейді Президент.
Сөзін жалғай келе, заң мен тәртіп үстемдік етуі керектігін айтып өтті.
«Азаматтарымыз үйде де, түзде де өзін қауіпсіз сезінуге тиіс. Бір сөзбен, қауіпсіз ортада өмір сүруі керек. Заң мен тәртіп қатаң сақталуға тиіс, яғни қоғамда заң үстемдігі болуы қажет. Ең бастысы, біз мейірімді әрі мәдениетті ұрпақ тәрбиелеуіміз керек», - дейді ол.
