Бірнеше ауданда қар күреу жұмысы жүргізіліп жатыр
ШҚО-да су тасқынының алдын алу шаралары жалғасып жатыр. Өңірлік төтенше жағдайлар департаменті баспасөз қызметінің мәліметінше, Риддер қаласында тасқынды болдырмау мақсатында арықтарды қардан тазалау жұмысы жүргізіліп жатыр, деп хабарлайды Sarbaz.kz.
«Тарбағатай ауданындағы 8 ауылда су өткізгіш құрылғыларды, арықтарды қардан тазалау жұмыстары қолға алынды. Ал Глубокое ауданы Бобровка ауылындағы Бобровочка өзенінің көпірі қардан тазартылды. Шемонаиха ауданы да жұмыстар үздіксіз жалғасуда», - делінген ақпаратта.
Күршім, Алтай, Ұлан аудандарында су тасқыны қаупі бойынша жағдай аудан басшыларының бақылауына алынды. Барлық округ әкімдеріне жанар-жағармайды жеткілікті мөлшерде дайындауға тапсырма берілген.
Сондай-ақ Алтай ауданына қарасты Зубовск ауылында 68303 әскери бөлімінің 25 сарбазы арық тазалау жұмыстарына көмектесіп жатыр.
