Ол бұрын ұйымдасқан қылмыстық топтың мүшесі болған
Абай облысында полиция қызметкерлері қылмыстық топтың 5 жыл бойы іздеуде жүрген мүшесін ұстады. Бұл туралы Sarbaz.kz тілшісі Облыстық полиция департаментінің баспасөз қызметіне сілтеме жасап хабарлайды.
Ведомство мәліметінше, аса ауыр қылмыс жасады деп күдіктелген ер адам құрықталды.
Ол бұрын ұйымдасқан қылмыстық топтың мүшесі болған. 2019 жылы Алматы қаласының 40 жастағы тұрғыны атыс қаруынан атып өлтірілді.
Сол кезде қылмыстық топтың тек бір мүшесі сот төрелігінен қашып кеткен.
Ер адам 5 жыл бойы құқық қорғау органдарынан жасырынып жүрді.
«Ұйымдасқан қылмысқа қарсы күрес басқармасының қызметкерлері жедел-іздестіру шараларының нәтижесінде оны Үржар ауданында ұстады. Сонымен қатар ер адамнан патрондары бар ТТ тапаншасы тәркіленді. Тиісті сараптамалар тағайындалған. Тергеу амалдары жүргізіліп жатыр», – делінген хабарламада.
