Владимир Зеленскийдің Кеңсе басшысының кеңесшісі Михаил Подоляк 2023 жылғы шабуылдардың сәтсіз болғанын мойындады
Украинаның қарсы шабуылы сәтсіз болды. Бұл туралы Владимир Зеленскийдің Кеңсе басшысының кеңесшісі Михаил Подоляк «24 канал» арнасына берген сұхбатында айтты, деп хабарлайды Sarbaz.kz.
«Шабуылға қатысты айтар болсақ, иә, 2023 жылы белгілі бір тактикалық қателіктер болды, бұл туралы әскери және саяси басшылық та айтып жүр. Бірақ бұл мәселе емес, өйткені бұл жай ғана оқиға да емес, бұл – соғыс. Бізге қарсы соғыс жүргізіп жатқан ресурсы шектеулі шағын ғана ел емес, ол Ресей ғой», - деді ол.
Сонымен қатар Подоляк Еуропа елдерінің біріккен экономикасы Украинаға көмектесуі керек екенін баса айтты. Оның айтуынша, Украина Қарулы күштерінде қару-жарақ тапшылығы сезіледі, снарядтар жетіспейді. Ал Киевтің одақтастары зымырандар, дрондар өндірісін ұлғайту қажеттілігін көріп отыр.
