Израильдің әскери күшінің көп бөлігі Хан-Юнис аймағында шоғырланған
Израиль қорғаныс армиясы (ЦАХАЛ) Газа секторының бүкіл аумағында жаппай соққылар жасауды жалғастырып жатыр, деп хабарлайды Sarbaz.kz dw.com сайтына сілтеме жасап.
Әскери күштің көп бөлігі Газа аймағының оңтүстігіндегі Хан-Юнис қаласының маңында шоғырланған. Онда Израиль әскери күштері ХАМАС қозғалысына қарсы шабуылды күшейте түскен.
ЦАХАЛ мәліметі бойынша, Хан-Юнисте әскери кешен мен зымыран тасығыштар жойылды. Сондай-ақ жер астында сақталған жарылғыш құрылғылар табылды. Газа секторының солтүстігіндегі Джабалия қаласының маңында да қарқынды шайқастар туралы хабарланды.
Израильдің соққыларының салдарынан соңғы тәулікте 165 адам қаза тауып, тағы 280 адам жарақат алды. ХАМАС бақылауындағы Газа секторының Денсаулық сақтау министрлігі қаза тапқандар санын есептеу кезінде содырлар мен бейбіт тұрғындар арасында ешқандай айырмашылық жасамайды.
