Аяз ата мен Ақшақар да үлкен шаңыраққа мерекелік көңіл-күй сыйлады
«Оңтүстік» өңірлік қолбасшылығы әскерлерінің қолбасшысы генерал-майор Қуанышбек Үштаев мереке қарсаңында Қызылордадағы 35748 әскери бөлімінің бөлімше командирі 3-сыныпты сержант Алмас Шұңғыловтың балаларына Қорғаныс министрінің жаңа жылдық сыйлықтарын табыс етті, деп хабарлайды Sarbaz.kz Қорғаныс министрлігінің баспасөз қызметіне сілтеме жасап.
Балаларға арналған спорттық костюмдер мен аяқ киімдерді, планшет пен сурет салуға арналған керек-жарақтарды, ойыншықтар мен басқа да тәтті сыйлықтарды жеті ұл, үш қыз тәрбиелеп отырған батыр ана Жәмилаға арнайы жолдаған Қорғаныс министрі генерал-полковник Руслан Жақсылықов көптеген қазақстандықтар үшін тату отбасының үлгісіне айналған көп балалы отбасына деген жылы лебізін де білдірген.
Генерал-майор Қуанышбек Үштаевпен бірге келген Аяз ата мен Ақшақар да үлкен шаңыраққа мерекелік көңіл-күй сыйлады. Қолбасшының көп балалы отбасыға жасаған мерекелік сапары балаларға әскердің ең алдымен үлкен әрі тату отбасы екенін, сондай-ақ мұндай үлкен ұжымда ешкім де қамқорлықсыз қалмайтыны көрсетті. Жаңа жылдық тосынсыйлар мен мерекелік көңіл-күй барша отбасына қуаныш сыйлары сөзсіз.
