Бауыржан Момышұлы атындағы Алматы республикалық «Жас ұлан» мектебінде белгілі қаламгер, Бауыржан Момышұлының келіні Зейнеп Ахметовамен кездесу өтті, деп хабарлайды Sarbaz.kz.

«Батыр рухымен сырласу» атты кездесуде Зейнеп Ахметова отбасындағы естеліктер туралы айтты.

«Атам, «...Мен өлгенмен, менің атым өлмейді, менен құтыла алмайсыңдар...» деуші еді. Шынымен де, қазіргі таңда Қазақстанның қай түкпіріне бармайын, атамның есімін арқалаған қанша азаматтар бар, бірнеше мектептерге, көшелер мен даңғылдарға есімі берілген. Ата осылардың бәрін алдын-ала сезгендей қалай айтты екен.. деп кейде таң қаламын...!», - деді Зейнеп Ахметова.

Мектеп ұландары Бауыржан Момышұлы туралы сұрақтар қойып, жазушыға жылы лебіздерін білдірді.

Іс-шара мектеп ұландарының концерттік бағдарламасына ұласты. Батырдың өмір жолынан қойылымдар көрсетіліп, әскери бағыттағы естеліктерінен үзінділер оқылды.

Кештің қорытынды бөлімінде мектеп басшысы, полковник Нұрлыхан Ерекешов Зейнеп Ахметоваға зор ризашылығын білдіріп, мектептің құрылғанына 40 жыл толу мерейтойына  арналған төс белгімен марапаттап, мектептің тарихы жайлы  баяндайтын кітапты табыстады. 

Гүлімжан Мұхамеджанқызы, 

Бауыржан Момышұлы атындағы

Алматы республикалық «Жас ұлан» мектебінің әдіскері