ОСК шешіміне келіспейтін Дунцова РФ Жоғарғы сотына шағымданбақ
Ресей Федерациясының Орталық сайлау комиссиясы президенттікке үміткер Екатерина Дунцованың кандидатурасын қабылдамады. ОСК шешіміне байланысты Дунцова Жоғарғы сотқа шағым дайындап жатқанын мәлімдеді, деп хабарлайды Sarbaz.kz тілшісі.
«Ресми бас тарту қағазы қолымызда тұр. Кешегі отырыста белгіленген «кемшіліктердің» ешқайсысы бастамашыл топты тіркеуден бас тарту туралы шешімнің негізі бола алмайды. Құжаттарды ресімдеудегі ақаулар бас тарту үшін негіз ретінде заңда көзделмеген. ОСК-ның ресми негіздемесінде 17 желтоқсанда бастамашыл топтың жиналысына қатысқан өкілдің баяндамалық жазбасына сілтеме жасалды. Бас тартудың ресми негізі – сайлаушылар тобының құрылмауында болып тұр. Жиналысқа қатысқандардың барлығы, соның ішінде журналистер де біздің тіркеуді жүргізгенімізді көрді, топ мүшелерінің санын анықтады және тіркеу жабылғаннан кейін ғана жиналысқа кірісті, оның күн тәртібін бекітті, оған дәйекті дауыс берді. ОСК өкілдері де оған қатысып, барлығын өз көздерімен көрді. Қазір біз ОСК шешіміне байланысты Жоғарғы сотқа шағым дайындап жатырмыз және оны жақын арада тапсырамыз», - деп жазды Дунцова телеграм арнасында.
Сонымен қатар Дунцова құжат ресімдеу кезінде нотариуспен де мәселе туындағанын мәлім етті.
«Нотариат – мемлекет бақылайтын құрылым, әр нотариус өзінің лицензиясын бағалайды және оны жоғалтудан қорқады. Бастамашыл топ мүшелерінің тізімін, олардың қолдары мен жиналыс хаттамаларын куәландыратын нотариусты іздеген кезде бізге 50-ден аса нотариус қызмет көрсетуден бас тартты. Әртүрлі нотариустарға қоңырау шалдық, мен Мәскеудегі ондаған кеңсені аралап шықтым және барлық жерде себепсіз теріс жауап алдық. Соңында келіскен нотариус жиналыстан кейін бірнеше сағатқа созылған Әділет министрлігінің жоспардан тыс тексеруіне тап болды. Онда не болғаны белгісіз, адвокат қатыстырылмады. Содан кейін «бәрі қалыпты» деп құрғақ жауап қайырды. Қолдар мен деректерді растаудың нотариаттық тәртібі науқанның әртүрлі кезеңдерінде және қол жинау үшін қажет. Бұл – тәуелсіз кандидаттар үшін тағы бір әкімшілік кедергі. Енді билік тарапынан «жасыл жарық» жоқ бірде-бір нотариус сайлауда түрлі сылтаумен қызмет көрсетуге келіспейді деп ойлаймын», - деді Дунцова.
Бұған дейін Екатерина Дунцованың бұрын немен айналысқанын, қандай мәселе көтергенін жариялаған болатынбыз.
