Тергеудің мақсаты – Байден өзінің вице-президент кезінде шетелден табыс табу үшін өзінің қызметтік жағдайын асыра пайдаланғанын анықтау
АҚШ Өкілдер палатасының спикері Кевин Маккарти президент Джо Байденнің отбасының қаржылық қызметіне қатысты тергеу импичмент ісін бастауға себеп болуы мүмкін деп санайды, деп хабарлайды Sarbaz.kz тілшісі Fox News-ке сілтеме жасап.
«Бұл жағдай конгреске барлық қажетті ақпаратты (Байденнің отбасының қаржылық қызметі туралы) алуға мүмкіндік беретін импичмент процедурасын бастауға себеп болуы мүмкін», - деді Маккарти телеарнаға берген сұхбатында.
Маккарти Байден президенттікке үміткер болған кезде ол америкалықтарға Хантер Байденнің бизнесін ешқашан талқыламағанын айтқанын еске алды.
«Ол оның отбасы Қытайдан бір доллар алмағанын айтты. Бұл айтқандары қазір шындыққа жанаспайтынын дәлелдедік», - деп қосты спикер.
Маккарти сонымен қатар Байденді үкіметті Конгресті бақылауды жүзеге асыру мүмкіндігінен айыру құралына айналдырды деп айыптады.
Fox News Өкілдер палатасының қадағалау комитетінің төрағасы Джеймс Комердің дайындаған пікіріне сәйкес, Байденнің отбасы 17 төлем бойынша 1 миллионнан аса доллар алғанын атап өтті. Ал Маккартидің айтуынша, 17 төлемнің 16-сы Байден вице-президент болған кезде оның жасанды компанияларының шотына түскен.
Федералды тергеу бюросына сілтеме жасаған Маккарти Байден кезінде вице-президент ретінде Украинаның Burisma компаниясының басшысынан 5 миллион доллар алып, оның құрамына ұлы Хантердің кіргенін алға тартты.
Сейсенбі күні Хантер Байденге қатысты қылмыстық тергеу жүргізген Делавэр штатының федералды прокуроры Дэвид Вайс осы күзде Конгрестегі қоғамдық тыңдауларда куәлік беруді ұсынған болатын.
Өткен айда республикалық партияның Өкілдер палатасының мүшесі Лорен Боберт (Колорадо штаты) Байденге импичмент жариялауға шақыратын қарар ұсынды. Қарар мәтінінде Байден Америка-Мексика шекарасындағы әрекеттеріне байланысты билікті асыра пайдаланды және қызметтік міндеттерін орындамады деп айыпталды.
Бұған дейін Fox News АҚШ Өкілдер палатасының қадағалау және есеп беру комитетіне сілтеме жасай отырып, АҚШ президентінің отбасы мүшелері шет ел азаматтары мен компанияларынан миллиондаған доллар алғанын және оны жасыруға тырысқанын хабарлады. Осы комитет дайындаған құжатқа сәйкес, саясаткерлердің отбасы және олардың серіктестері 20-дан аса компания құрып, Байден АҚШ вице-президенті болған кезінде шетелдік көздерден 10 миллион доллардан аса қаражат алған-мыс.
Комитет тергеуінің мақсаты – Байден өзінің вице-президент кезінде шетелден табыс табу үшін өзінің қызметтік жағдайын асыра пайдаланғанын, заңды бұзғанын анықтау. Ақ үйде Өкілдер палатасының тергеуі сынға алынып, оны «тағы бір саяси қулық» деп атады.
АҚШ-тың бұрынғы президенті Дональд Трамп 2020 жылы тағайындаған прокурор Дэвид Вайс Хантер Байденнің салықтарына қатысты тергеу жүргізіп жатқанын америкалық БАҚ хабарлаған болатын. Прокурор көптеген қаржылық мәселелерді зерттеген. Соның ішінде Хантер Байден мен оның сыбайластары шетелдік серіктестерімен, негізінен Қытаймен іскерлік операциялар кезінде салық заңдары мен ақшаны жылыстату туралы заңдарды өрескел бұзуы мүмкін деп топшылады. Бұл ретте кіші Байден қару сатып алуға байланысты жалған куәлік берді деген күдікке ілінді.
АҚШ Әділет министрлігі Хантер Байденнің қаржылық қызметіне қатысты жүргізіліп жатқан тергеу аясында Джо Байден Барак Обаманың президент кезінде АҚШ-тың вице-президенті болған уақытта оның украиналық Burisma компаниясындағы жұмысына қатысты ақпаратқа сауал жолдаған.
Ал Джо Байден ұлының заңсыз ештеңе жасамағанына сенім білдіріп, Хантердің қаржылық қызметіне қатысты тергеу бірінші кезекте өзіне бағытталған шабуыл деп мәлімдеді.
Трамп құзырлы органдардан бірнеше рет кіші Байденнің Burisma-да Басқарма мүшесі лауазымына қалай ие болғанын анықтауды сұрады. Сонымен қатар Трамп Байденді ұлының бизнесіне көмектесу үшін өзінің қызметтік жағдайын пайдаланды деп айыптаған болатын.
