Жастарға әскери-патриоттық тәрбие беруді дамыту мәселесі талқыланды
ҚР Қорғаныс министрлігінің әскери клиникалық госпиталі мен Алматы жолаушылар көлігі және технологиялар колледжі өзара ынтымақтастық және «Жас дәрігер» әскери-патриоттық клубын құру туралы меморандумға қол қойды. Бұл туралы Sarbaz.kz Қорғаныс министрлігінің баспасөз қызметіне сілтеме жасап хабарлайды.
Шарттың негізгі мақсаты – жастардың бастамаларына қолдау көрсету, бірлескен жобаларды іске асыру, сондай-ақ өскелең ұрпақты әскери-патриоттық іс-шараларға кеңінен тарту.
ҚР Қорғаныс министрлігі әскери клиникалық госпиталінің бастығы медицина қызметінің подполковнигі Асқар Рысбаев әскери-патриоттық клубтар жастардың бос уақытын ұйымдастыру үшін маңызды әлеуметтік-педагогикалық негіз болып саналатынын атап өтті.
– Клубқа он бес студент қосылды. Біз оларға алғашқы медициналық көмек көрсету дағдыларын үйретеміз. Бұл білім олардың өмірінде пайдалы болуы мүмкін, – деді ол.
Кездесу барысында жастарға әскери-патриоттық тәрбие беруді дамыту бойынша бірлескен іс-қимыл жоспары бекітілді. Олардың қатарында кездесулер, спорттық іс-шаралар, түрлі конференциялар, семинарлар мен конкурстар өткізу бар.
Бүгінгі таңда ҚР Қарулы күштерінің Бас әскери-медициналық басқармасы Алматы, Талдықорған және Тараз қалаларындағы орта оқу орындарының базасында үш «Жас дәрігер» әскери-патриоттық клубын ашты. Онда әскери дәрігерлер оқушыларға әскери-медициналық даярлық негіздерін үйретеді.
