Полиция өзін-өзі өлтіруге дейін жеткізу бабы бойынша қылмыстық іс қозғаған
Алматы облысында 11 жастағы мектеп оқушысы суицид жасады. Бұл оқиғаны Жамбыл аудандық әкімдігі растады, деп хабарлайды Sarbaz.kz.
Полиция аталған жағдайға қатысты ҚР ҚК-нің 105-бабы (Өзін-өзі өлтіруге дейін жеткізу) бойынша қылмыстық іс қозғаған. Бала Жамбыл ауданы Ұзынағаш ауылындағы мектептердің бірінде оқыған. 6-сынып оқушысының суицидке баруының себебі белгісіз.
«Бұл оқиға демалыс күні баланың отбасында болған. Мектеп оқушысы толық отбасынан шыққан. Мектептен ешқандай қысым көрмеген, оқу үлгерімі де жақсы. Ата-анасының екеуі де жұмыс істейді. Әкесі жедел жәрдем қызметінде, анасы да медицина саласында. Баланың қысым көргені жайлы ақпарат жоқ, арнайы тергеп-тексеру жүріп жатыр. Неге мұндай қайғылы жағдай болғаны түсініксіз. Сенбі күні кешкі уақытта орын алған», - деді Жамбыл ауданы әкімдігінің баспасөз қызметі.
Ал Алматы облысының әкімдігі қайғылы жағдайға душар болған отабасына жан-жақты қолдау көрсететіндерін айтты. Жалпы Алматы облысында өз өмірлерін қиятын балалар саны азаймай тұр.
